Tanymal qarjy sarapshysy Aıbar Oljaı Magnum-ǵa qatysty halyq kókeıindegi ózekti máseleni qozǵap, pikir bildirdi, dep habarlaıdy Dalanews.kz.
Onyń sózinshe, senbide Almatydaǵy "Jetisý" yqsham aýdanyndaǵy irgeli Magnýmǵa bas suǵyp, gıpermarket sóresinen otandyq ónimdi taba almaǵan.
"Bul tarıhtaǵy eń tuńǵysh Magným gıpermarketi. Osy dúken jaqsy tabys ákelgennen keıin, Magným saýda jelisi retinde odan ári damyǵan bolatyn. Sórelerdi on aınalyp, ózimizdiń otandyq maıonezdi taba almadym. İzdegenim Almatyda óndiriletin "3 jelanıe" maıonezi bolatyn. Gıpermarket qyzmetkeri qazirgi tańda qazaqstandyq maıonezdiń satylmaıtyndyǵyn rastady. Magným Qazaqstandyq maıonezdi alyp tastap, ornyna Reseıdiń "Makeev" maıonezin toltyryp tastaǵan. Buǵan deıin de, jarmalar men suıyq maı pozısıalarynda Magnýmnyń otandyq emes, reseılik taýarlardy kóbirek ótkizýge tyrysatyndyǵyn baıqap júrgen bolatynmyn. Biraq bul jolǵysy ábden shekten shyqty. Magným jekemenshik bıznes. Ol qazaqstandyq ónimdi múlde satpaı, sórelerdi Brazılıanyń býbýzelasymen toltyryp qoısa da óz erki. Biraq ondaıy bar bolatyn bolsa, memleketten ne úshin 0,01 paıyzben tegin aqsha alyp otyr degen suraq týyndaıdy. Sońǵy 5 jylda Magným bir Almatynyń ózinen keminde 13 mıllıard teńge kómek alǵan. Al basqa óńirlerdi qosa alsaq, joq degende 17-18 mıllıard teńge shyǵýy múmkin", - deıdi sarapshy.
Bul rette sarapshy Saýda mınıstrligi tarapynan úlken logıkalyq qatelik baryn aıtty.
"Olar Magným sıaqty iri saýda jelilerine paıyzsyz nesıe taratyp otyrǵanda tek belgili bir áleýmettik azyq-túlikke baǵany ósirmeý boıynsha talap qoıady. Biraq "ol taýar otandyq bolýy tıis" degen shart joq. Sondyqtan mysaly, "arzan sút sat" dep talap qoıyp, memlekettik kómek berilgende, Magným ol aqshany alyp, Belarýstyń arzan sútin satyp otyra alady. Ol bizdiń otandyq taýar óndirýshini qoldaý boıynsha ekonomıkalyq logıkamyzǵa, osy salaǵa beriletin 8 trıllıon teńge ınvestısıamyzǵa múlde qaıshy, qarama-qarsy sheshim", - deıdi ol.
Qarjy sarapshysynyń sózinshe, qazir Básekelistikti qorǵaý jáne damytý agenttigi men Magným arasynda birshama teketires bar. Sebebi Magným taýar satyp paıda kórýdiń ornyna, taýar óndirýshilerge túrli jarnamalyq, sóredegi oryndar boıynsha tarıfter qoıyp, soǵan qosymsha aqsha tóleýge májbúrlep, negizgi tabysty sodan alatyn bolǵan. Al bul qylyǵy otandyq taýar óndirýshilerge aýyr tıip otyrǵan kórinedi.
"Magným basshylyǵy strategıalyq jaǵynan óte taıaz oılap otyr. Olar qazir áldebir ıdeologıalyq nemese qysqamerzimdi kelisimder esebinen Reseı ekonomıkasyna kómekteskisi keledi. Osyndaı sharýalary arqasynda Qazaqstannyń Reseıden alatyn azyq-túlik ımporty 2024 jyly 10 paıyzǵa ósip ketti. Qazir Reseıden 1,9 mıllıard dollarǵa azyq-túlik alamyz. Endi osy 2 mıllıardtyq aqsha kanaly rúbldiń teńgege yqpalyn qamtamasyz etedi de, erteń Reseıde mindetti túrde oryn alatyn ınflásıa bizge de áser beredi. Al rúbl qulap ketetin bolsa, ol teńge baǵamyna qysym jasaı bastaıdy", - deıdi ol.
Oǵan qosa Magným eldegi azyq-túlik saýdasynyń 8 paıyz úlesin alyp otyr.
"Bul - eń úlken úles. Onyń otandyq óndirýshilerdi qoldamaýy, ónimderin sóreden alyp tastaýy bizdiń óndirýshilerdiń satý kólemin azaıtyp, jaǵdaıyn nasharlatady. Bul tıisinshe olardyń qyzmetkerleriniń aılyǵynyń óspeýine, jumys oryndarynyń qysqarýyna alyp keledi. Turmysy nasharlap qalǵan adamdar Magnýmnan tamaq alýyn azaıtady. Sonda Magnýmnyń ózi otyrǵan butaqty óz qolymen kesip jatqandyǵyn aıqyn kóremiz. Jáne ol bul qylyǵymen Qazaqstan ekonomıkasynyń turaqtylyǵy men ósýine qarsy jumys istep jatyr", - deıdi sarapshy.
Aıbar Oljaı bul tusta eki ǵana jol baryn aıtty.
"Ne Magnýmǵa memleketten aqsha bólinbeý kerek. Olar bilgenin satsyn. Ne Magnýmǵa memleketten aqsha bóliný jalǵassa, onda otandyq azyq-túlikti qandaı jaǵdaı bolmasyn sóreden alyp tastaýǵa tıym salý kerek. Qazaqstan - Ortalyq Azıanyń maıonez derjavasy. Almatydaǵy maqtaýly kásiporyn "Eýrazıan Fýd" qazaq maıonezin Aýǵanstannan bastap Shyǵys Eýropaǵa deıin satyp otyrǵanda, ózimizdiń eń iri saýda jelisi otandyq maıonezdi Reseıdiń eshkim jemeıtin Makeev markasymen aýystyrǵany Magnum Cash & Carry basshysy Azamat Osmanovtyń atyna úlken syn boldy.
Osy aptada Úkimettegi eń bıik kabınetten Magnýmǵa eskertý sıgnaly kelýi tıis. Al juma kúni Jetisýdegi ańyzǵa aınalǵan gıpermarketine taǵy baryp, qazaq maıoneziniń sóredegi taǵdyryn bir tekseremin. Magným odan sabaq almasa, másele Májilis depýtattaryna jetetin bolady", - dep túıindedi ol sózin.
Aıta keteıik, buǵan deıin de Magnum-nyń basy daýǵa qaldy. Áleýmettik jelilerde Magnum sýpermarketter jelisiniń kýreri jumystan shyǵarylýy úlken talqyǵa tústi. Bul jaǵdaı kýrer klıentten qazaq tilinde sóıleýin suraýynan keıin boldy.
Klıent Asylhan esimdi azamattyń aıtýynsha, ol Magnum-nan azyq-túlikke tapsyrys bergen kezde kýrer odan qazaqsha sóıleýdi talap etken. Keıin bul oqıǵa áleýmettik jelide jarıalanyp, nátıjesinde kýrer jumystan qýylǵan edi. Dese de artynsha ekeýi tatýlasyp, vıdeo jarıalady.
Klıent Asylhan esimdi azamattyń aıtýynsha, ol Magnum-nan azyq-túlikke tapsyrys bergen kezde kýrer odan qazaqsha sóıleýdi talap etken. Keıin bul oqıǵa áleýmettik jelide jarıalanyp, nátıjesinde kýrer jumystan qýylǵan edi. Dese de artynsha ekeýi tatýlasyp, vıdeo jarıalady.
