Saqtandyrý naryǵynda jumys isteitin "Eýraziia" kompaniiasynyń dereginshe, Qazaqstanda jol-kólik oqiǵasy keiingi bir jylda 40 paiyzǵa ósken. Bul resmi statistikadan birneshe esege artyq, dep habarlaidy Dalanews.kz.
Saqtandyrýshylardyń málimetteri men Bas prokýratýranyń statistikasy arasynda aitarlyqtai alshaqtyq bar. Qadaǵalaý organy tek adam zardap shekken nemese qaitys bolǵan apattardy ǵana tirkeidi. Al shyn máninde joldaǵy apattardyń basym bóliginde adam emes, kólikter zardap shegedi.
Bul aiyrmashylyq, ásirese, Astana qalasynda anyq baiqalyp otyr. Elordanyń jol apaty boiynsha statistikasynda saqtandyrý kompaniialary usynǵan derek pen resmi málimettiń arasyndaǵy aiyrmashylyq 11,59 esege jetken.
2024 jyly 250 myń avtokólik jol-kólik oqiǵalary saldarynan zardap shekken. Bul – Qazaqstandaǵy jalpy kólik parkiniń 4,5 paiyzy. Saqtandyrý kompaniialary bir jyldyń ishinde 131,5 myń ret ótemaqy tólegen. Eń kóp saqtandyrý tólemin elordalyq kólik ieleri alǵan. Odan keiingi oryndarda Almaty men Almaty oblysy tur.
"Saqtandyrý kompaniialarynyń málimeti shynaiy jaǵdaidy tolyqqandy kórsetedi. Biz barlyq usaq jol-kólik oqiǵasyn da esepke alamyz. 2025 jyly jol apaty men saqtandyrý tólemderi sanynyń kúrt artqanyn baiqadyq. Buǵan moped ieleriniń de mindetti saqtandyrý júiesine qosylǵany áser etti. Avtokólik ieleri táýekeldiń artqanyn sezinip, qosymsha saqtandyrý qyzmeti – kaskoǵa kóbirek júginip jatyr. Byltyrdyń ózinde 536 myńnan asa kólik kasko polisimen qamtyldy. Bul – avtoparktiń 9,35 paiyzy", – deidi "Eýraziia" kompaniiasynyń sarapshylary.
Kompaniia apattyń kóbeiýiniń basty sebebin kólik sanynyń artýymen túsindirdi. Jeke avtokólik ieleriniń sany Qazaqstanda jyl saiyn ósip keledi. Tiisinshe jol apattary da kóbeigen.
