ساقتاندىرۋ نارىعىندا جۇمىس ٸستەيتٸن "ەۋرازييا" كومپانيياسىنىڭ دەرەگٸنشە, قازاقستاندا جول-كٶلٸك وقيعاسى كەيٸنگٸ بٸر جىلدا 40 پايىزعا ٶسكەن. بۇل رەسمي ستاتيستيكادان بٸرنەشە ەسەگە ارتىق, دەپ حابارلايدى Dalanews.kz.
ساقتاندىرۋشىلاردىڭ مەلٸمەتتەرٸ مەن باس پروكۋراتۋرانىڭ ستاتيستيكاسى اراسىندا ايتارلىقتاي الشاقتىق بار. قاداعالاۋ ورگانى تەك ادام زارداپ شەككەن نەمەسە قايتىس بولعان اپاتتاردى عانا تٸركەيدٸ. ال شىن مەنٸندە جولداعى اپاتتاردىڭ باسىم بٶلٸگٸندە ادام ەمەس, كٶلٸكتەر زارداپ شەگەدٸ.
بۇل ايىرماشىلىق, ەسٸرەسە, استانا قالاسىندا انىق بايقالىپ وتىر. ەلوردانىڭ جول اپاتى بويىنشا ستاتيستيكاسىندا ساقتاندىرۋ كومپانييالارى ۇسىنعان دەرەك پەن رەسمي مەلٸمەتتٸڭ اراسىنداعى ايىرماشىلىق 11,59 ەسەگە جەتكەن.
2024 جىلى 250 مىڭ اۆتوكٶلٸك جول-كٶلٸك وقيعالارى سالدارىنان زارداپ شەككەن. بۇل – قازاقستانداعى جالپى كٶلٸك پاركٸنٸڭ 4,5 پايىزى. ساقتاندىرۋ كومپانييالارى بٸر جىلدىڭ ٸشٸندە 131,5 مىڭ رەت ٶتەماقى تٶلەگەن. ەڭ كٶپ ساقتاندىرۋ تٶلەمٸن ەلوردالىق كٶلٸك يەلەرٸ العان. ودان كەيٸنگٸ ورىنداردا الماتى مەن الماتى وبلىسى تۇر.
"ساقتاندىرۋ كومپانييالارىنىڭ مەلٸمەتٸ شىنايى جاعدايدى تولىققاندى كٶرسەتەدٸ. بٸز بارلىق ۇساق جول-كٶلٸك وقيعاسىن دا ەسەپكە الامىز. 2025 جىلى جول اپاتى مەن ساقتاندىرۋ تٶلەمدەرٸ سانىنىڭ كٷرت ارتقانىن بايقادىق. بۇعان موپەد يەلەرٸنٸڭ دە مٸندەتتٸ ساقتاندىرۋ جٷيەسٸنە قوسىلعانى ەسەر ەتتٸ. اۆتوكٶلٸك يەلەرٸ تەۋەكەلدٸڭ ارتقانىن سەزٸنٸپ, قوسىمشا ساقتاندىرۋ قىزمەتٸ – كاسكوعا كٶبٸرەك جٷگٸنٸپ جاتىر. بىلتىردىڭ ٶزٸندە 536 مىڭنان اسا كٶلٸك كاسكو پوليسٸمەن قامتىلدى. بۇل – اۆتوپاركتٸڭ 9,35 پايىزى", – دەيدٸ "ەۋرازييا" كومپانيياسىنىڭ ساراپشىلارى.
كومپانييا اپاتتىڭ كٶبەيۋٸنٸڭ باستى سەبەبٸن كٶلٸك سانىنىڭ ارتۋىمەن تٷسٸندٸردٸ. جەكە اۆتوكٶلٸك يەلەرٸنٸڭ سانى قازاقستاندا جىل سايىن ٶسٸپ كەلەدٸ. تيٸسٸنشە جول اپاتتارى دا كٶبەيگەن.
