Qazaqstanda salyq organdary onlain-platformalar arqyly jumys isteitin ózin-ózi jumyspen qamtýshylardyń tabysyn jiti baqylai bastaityn bolady. Bul bastama kóleńkeli ekonomikanyń úlesin azaityp, biýdjet kirisin salyqty kótermei-aq arttyrýǵa baǵyttalǵan. Atap aitqanda, Qarjy ministrligi kýrerlik qyzmet, marketpleister, frilans alańdary sekildi onlain-platformalardy paidalanatyn azamattardyń tabysyn baqylaýdy qarastyratyn jańa erejeler ázirlep jatyr, dep habarlaidy Dalanews.kz.
Endigi jerde mundai tsifrlyq platformalar ózderindegi jeke tulǵalar týraly málimetti memlekettik kirister organyna turaqty ári esep túrinde berip otyrýǵa mindettelmek.
Jańa talap, negizinen, klientterden tikelei tólem qabyldap, platformany ainalyp ótetin jeke kásipkerler men ózin-ózi jumyspen qamtyǵan azamattarǵa da qatysty bolady. Sebebi osy sanattaǵy tabys kóbine kóleńkede qalyp, salyq organdarynyń baqylaýyna túspei jatady.
Jospar boiynsha onlain-platformalar salyq organdaryna óz alańdarynda qyzmet kórsetetin azamattardyń aty-jónin, JSN nómirin, qandai qyzmet túrin kórsetetinin jáne qanshalyqty jii jumys isteitinin habarlap turýy tiis. Bul ereje, tipti platforma arqyly qarjylyq esep aiyrysý júrgizilmegen jaǵdaida da qoldanylady.
Qarjy ministrligi bul jańalyq kóleńkeli qyzmet naryǵymen kúresip, ózin-ózi jumyspen qamtyǵan azamattardyń naqty tabysyn anyqtaýǵa kómektesedi dep sanaidy. Túpki maqsat – azamattardyń salyq mindettemesin oryndaýyn qamtamasyz etip, bolashaqta olardyń áleýmettik tólemder men zeinetaqy alý múmkindigin arttyrý.
Jańa bastamanyń negizgi maqsaty:
- "kóleńkeli tabys" kólemin azaitý;
- tabys kózderin zańdastyrý;
- ádil ári ashyq básekelestikti qalyptastyrý;
- azamattardyń áleýmettik jáne salyqtyq jaýapkershiligin arttyrý.
Shyn máninde, munyń tsifrlyq eńbek naryǵyn qalyptastyrýǵa bailanysty jasalǵan mańyzdy qadam ekeni aitylady.
Atalǵan qujat qazirgi ýaqytta "Ashyq NQA" portaly arqyly qoǵamdyq talqyǵa usynyldy.
