Qazaqstan biligimen sottasqan Qashaǵan kenishindegi sheteldik investorlar sotta jeńiske jetti. Bul arada 4 milliard dollardan astam aiyppulǵa qatysty daý týraly sóz bolyp otyr. Sot NCOC konsortsiýmy músheleriniń paidasyna qarai sheshim shyǵardy, dep habarlaidy Dalanews.kz.
Qazaqstan biligi Qashaǵan investorlarynan ekologiialyq talapty buzǵany úshin 2,3 trillion teńge (aiyppul salynǵan kezdegi baǵammen 5,1 mlrd dollar, qazirgi baǵammen shamamen 4,2 mlrd dollar) óndirmek bolǵan. Aiyppul, negizinen, ken ornyndaǵy kúkirttiń normativten tys saqtalýyna qatysty. Alaida investorlar sot arqyly óz áreketiniń zańdylyǵyn dáleldep shyqty.
"Apelliatsiialyq sottyń sheshimin qoldaimyz. Sheshim NCOC kompaniiasynyń kúkirtpen jumys isteýde Qazaqstan zańnamasyn qatań saqtaǵanyn, halyqaralyq talaptarǵa sai ári jaýapkershilikpen áreket etkenin rastaidy", delingen konsortsiým málimdemesinde.
Jalpy quny 55 milliard dollarǵa baǵalanǵan Qashaǵan jobasynyń iske qosylýy birneshe jylǵa sozylyp, túrli kedergilerge tap bolǵan. Osy ýaqyt ishinde joba seriktesteri arasynda baǵa saiasaty men ekologiialyq mindettemeler boiynsha daýly máseleler týyndady, dep jazady Bloomberg.
Qazaqstan úkimeti kenishten túsetin kiristiń ádiletsiz bólinip jatqanyn málimdep, investorlarǵa qatysty jalpy somasy 160 milliard dollardan asatyn talappen halyqaralyq arbitrajǵa júgindi.
Ótken jyly NCOC quramyndaǵy negizgi kompaniialar Eni, Shell, ExxonMobil jáne TotalEnergies kúkirtke qatysty daýdy áleýmettik jobalar arqyly sheshýdi usynǵan. Olar eki jyl ishinde Qazaqstandaǵy áleýmettik jobalarǵa qosymsha 110 mln dollar investitsiia salýǵa daiyn ekenin jetkizgen edi.
Ázirge Qazaqstannyń Energetika ministrligi investorlardyń sottaǵy jeńisine qatysty pikir bildirgen joq.
Investorlar 2025 jyly naýryz aiynda Qazaqstan úkimetiniń kúkirtke bailanysty talabyn moiyndamaitynyn aityp, Joǵarǵy sotqa júgingen edi. Sol kezde NCOC seriktesteri kúkirtten bólek, sýdy tazartý men ziiandy shyǵaryndylarǵa bailanysty taǵylǵan aiypty da negizsiz dep tanyǵan bolatyn.
Sarapshylar Qazaqstannyń mundai iri daýlarda jeńilis tabýy eldegi investitsiialyq klimatqa keri áser etýi múmkin ekenin aitady.
