Qyrkúiek aiynda OPEK+ aiasyndaǵy segiz memleket munai óndirý kólemine qatysty erikti shekteýlerdi táýligine 547 myń barrelge qysqartady. Bul Qazaqstannyń qyrkúiek aiynda munai óndirisin táýligine 1,5 mln barrelge deiin ulǵaitýǵa múmkindik beredi, dep habarlaidy Dalanews.kz.
Bul týraly uiymnyń resmi baspasóz habarlamasynda aitylǵan.
"Qazaqstan, Resei, Saýd Arabiiasy, BAÁ, Irak, Kýveit, Aljir jáne Oman ǵalamdyq munai naryǵyndaǵy turaqtylyqty qoldaýǵa daiyn ekendikterin rastady. Olar naryqtaǵy turaqty suranysty, qorlardyń tómen deńgeiin jáne qolaily irgeli kórsetkishterdi atai kele, bul ózderiniń aldynda engizilgen erikti shekteýlerdi joiýdyń kezekti kezeńine ótýge múmkindik bergenin naqtylaidy. Atalǵan sheshimge sáikes, qyrkúiek aiynda segiz el tamyz aiymen salystyrǵanda táýligine qoiylǵan erikti shekteýlerdi 547 myń barrelge qysqartady", delingen resmi habarlamada.
Bul - sáýir aiynda qolǵa alynǵan naryqtyń táýligine 2,2 million barrel munai óndirisine birtindep oralý jónindegi keń aýqymdy jospardyń bir bóligi. Bul sheshim turaqty ekonomikalyq boljamdar men naryqtaǵy qolaily jaǵdai, atap aitqanda, álemdik munai qorlarynyń tómen deńgeii aiasynda qabyldandy. Osylaisha, qatysýshy elder ózara kelisilgen erikti shekteýler rejiminen josparlanǵan merzimnen bir jyl buryn — 2025 jyldyń qyrkúieginiń sońynda, iaǵni 2026 jylǵa deiin kútpei-aq shyǵa alady. Alaida, naryqtaǵy jaǵdai kúrt nasharlasa, bul protsess toqtatylýy nemese múlde joiylýy múmkin.
Naryqqa qatysýshylar ikemdilikti saqtaý olarǵa naryqtyń aýytqýlaryna tezirek beiimdelýge jáne 2024 jyldyń qańtarynan bastap jinaqtalǵan artyq óndiris kólemin óteý boiynsha mindettemelerdi oryndaýǵa múmkindik beretinin atap ótti. Monitoring JMMC ýaǵdalastyqtarynyń oryndalýyn baqylaýdy qosa alǵanda, buryn kelisilgen OPEK+ tetikteri sheńberinde júrgiziletin bolady.
Segiz eldiń kelesi kezdesýi 2025 jyldyń 7 qyrkúieginde ótedi. Onyń qorytyndysy boiynsha OPEK+ elderi naryqtyń jai-kúiin jáne aǵymdaǵy sharalardyń tiimdiligin baǵamdaidy.
OPEK+ málimetinshe, qyrkúiek aiynda eń joǵary kvotalar kelesi elderge bólinbek:
- Saýd Arabiiasy – 9,978 mln barr./táýlik,
- Resei – 9,449 mln,
- Irak – 4,220 mln,
- BAÁ – 3,375 mln,
- Kýveit – 2,548 mln,
- Aljir – 959 myń,
- Oman – 801 myń.
