Búgin Qazaqstan musylmandary dinı basqarmasynyń tóraǵasy Naýryzbaı qajy Taǵanuly respýblıkalyq bas meshitte aıt namazyn júrgizip, jamaǵatqa ýaǵyz aıtty, dep habarlaıdy Dalanews.kz.

"Alla Taǵala pendeleriniń izgilik amal atqaryp, kóbirek saýap ister jasaýy úshin keıbir kúnder men túnderdi basqalarynan artyq etip qoıdy. Sondaı musylman balasynyń Jaratýshysynyń keshirimine bólenýge tyrysyp, izgi amaldarǵa erekshe ynta tanytýy qajet ýaqyttyń biri – osy Qurban aıt merekesiniń kezeńi. Bul aı musylman kúntizbesinde zulhıjja aıy dep atalady. Zulhıjja aıy musylmandar úshin asa qurmetti de jáne ardaqty aılardyń biri. Bul aıdyń alǵashqy on kúninde jasalatyn ǵıbadattardyń qadiri óte joǵary. Alla Taǵala qasıetti Qurannyń "Fájr" súresiniń alǵashqy eki aıatynda: "Tań shapaǵyna sert. Jáne (múbárák) on túnge sert", – dep aıtqan. Ardaqty Paıǵambarymyz (oǵan Allanyń salaýaty men sálemi bolsyn) zýlhıjja aıynyń alǵashqy on kúni jaıynda: "Alla Taǵalaǵa osy (on) kúnde istelgen ıgi isten jaqsyraq amal joq" (ımam Buharı)", - dep atap ótti Naýryzbaı qajy Taǵanuly.

Aıt namazynan keıin Bas múftı elimizdiń tynyshtyǵy men bolashaǵy úshin duǵa jasap, ata-babalar rýhyna Quran aıattaryn baǵyshtady.

Aıta ketsek, Qurban aıt namazy elimizdiń ár óńirinde tańǵy saǵat 06-00 men 07-00 arasynda oqyldy. Máselen, Astanada aıt namazy saǵat 06-00-ge kelse, al batys óńirlerde ol 06-30, SHQO men Abaı oblysynda 07-00-de oqyldy.