Almaty ákimdiginde adamdardy órt kezinde qutqaryp qalǵan qala turǵyny Asyl Ahmetovke erligi úshin qurmet kórsetilip, aqshalai syiaqy tabystaldy.
«Eńbegimdi elep, qurmet kórsetip, marapattap jatqanyńyz úshin alǵysym sheksiz. Bul – men úshin úlken mártebe. Qiyn jaǵdaiǵa tap bolǵan jandarǵa kómek kórsetýdi azamattyq boryshym dep bilemin. Bul áreketimdi marapat úshin emes, adami paryzym retinde jasadym. Meniń ornymda kez kelgen adam dál solai ister edi dep oilaimyn», – dedi Asyl Ahmetov.
Aita keteiik, buǵan deiin áleýmettik jelilerde er adamnyń tórtinshi qabatqa deiin órmelep shyǵyp, páter balkonynda tutanǵan órtti sóndirgen beinejazbasy taraǵan bolatyn.
Oqiǵa 4 maýsymda Naýryzbai aýdanyndaǵy «Alma Siti» turǵyn úi kesheninde bolǵan. Tórtinshi qabattaǵy páter balkonynda qoqys órtenip, órt sóndirýshiler kelgenge deiin sol mańnan ótip bara jatqan Asyl Ahmetov órtti óshirip úlgergen.
