Almaty oblysy men «Kitap oqityn ult – Chitaiýshaia natsiia» qoǵamdyq qory arasynda yntymaqtastyq týraly memorandýmǵa qol qoiyldy. Bul kelisim Memleket basshysynyń «Kitap oqý mádenietin damytý jáne zerdeli ult qalyptastyrý jónindegi sharalar týraly» Jarlyǵy aiasynda iske asyrylýda. Joba boiynsha óńirdegi kitaphanalar, mádeniet jáne bilim berý uiymdary arqyly birlesken jobalar men is-sharalardy uiymdastyrý, jastardyń intellektýaldyq jáne rýhani damýyna yqpal etetin bastamalardy júzege asyrý josparlanyp otyr, dep habarlaidy dalanews.kz.
«Kitap oqityn ult – Chitaiýshaia natsiia» qoǵamdyq qory byltyr shilde aiynda qurylyp, jumysyn bastaǵan. Ótken jyly Qaraǵandy, Qostanai oblystary men Shymkent qalasynda alǵashqy aǵartýshylyq jobalaryn júzege asyrdy. Nátijesinde 190 myńǵa jýyq adam kitap oqý daǵdysyn qalyptastyrǵan. Biyl olardyń sanyn 1,5-2 mln-ǵa arttyrý kózdelýde. Al Almaty oblysynda 100 myńnan asa adamdy qamtý josparlanǵan.
Sharaǵa qatysqan oblys ákimi Marat Sultanǵaziev el Prezidenti Qasym-Jomart Toqaevtyń kitap oqý mádenieti men kitaphana isin damytý máselesine erekshe mán berip otyrǵanyn atap ótti. Aimaq basshysynyń aitýynsha, búginde oblysta 145 kitaphana jumys isteidi. Olar 71 myńnan astam oqyrmanǵa qyzmet kórsetýde. Jalpy kitap qory 2,7 mln-nan asady. Kitaphanalar janynda kovorking ortalyqtary, klýbtar men úiirmeler jumys istep, jastardyń shyǵarmashylyq jáne ziiatkerlik damýyna jaǵdai jasalýda.
«Biyl Uiǵyr aýdandyq kitaphanasy, Qarasai aýdanyndaǵy Jandosov aýyldyq kitaphanasy jáne Eńbekshiqazaq aýdanyndaǵy Shelek aýyldyq kitaphanasy jańǵyrtylyp, paidalanýǵa berildi. Aldaǵy ýaqytta taǵy eki kitaphanany jańartý josparlanǵan.
2023 jyldan bastap barlyq aýdandyq kitaphanalar SAB IRBIS-64+ baǵdarlamasyna kóshirildi. Búgingi tańda elektrondyq katalogqa jáne elektrondyq kitaphana qoryna 1,9 mln-nan astam bibliografiialyq jazba engizildi. Sondai-aq KazNEB platformasyna 1 943 kitaptyń tsifrlyq nusqasy joldandy. Oblys boiynsha qoǵamdyq oryndarǵa 786 KazNEB QR-kody ornalastyrylyp, 82 myńnan astam elektrondyq kitapty paidalaný múmkindigi jasaldy», – dedi Marat Eleýsizuly.
Jiyn barysynda atalǵan qoǵamdyq qordyń tóraǵasy Baqytjan Turlybekov jobanyń maqsaty men atqarylǵan jumystary jaily baiandady.
«Kitaphana kitap saqtaityn oryn emes, bul – adamdar bilim alyp, tanym-túsinigin tereńdetetin rýhani orda. Osy maqsatta júzege asyrylyp jatqan joba aiasynda kitaphanalarǵa oqyrmandardy tartý jáne kitap oqý mádenietin qalyptastyrýǵa erekshe kóńil bólinýde. Bizdiń basty maqsattarymyzdyń biri – kitaphanalardy oqyrmanǵa toltyrý. Jumys barysynda halyqtyń kitap oqýǵa yqylasy joǵary ekenin baiqadyq. Áýelde ár aimaqtan 25-30 myń adam qatysady dep oilaǵanbyz. Biraq nátije biz oilaǵannan da jaqsy boldy. Jobaǵa 190 myńǵa jýyq adam qatyssa, onyń 104 myńnan astamy usynylǵan 15 kitapty tolyq oqyp bitirgen. Bul test nátijesinde belgili boldy.
Biz 7 baǵyt boiynsha jumys isteimiz. Soǵan sáikes mektep oqýshylaryn, kolledj ben ýniversitet stýdentterin, sondai-aq pedagogterdi, jeke áýletterdi, memlekettik qyzmetshiler men sportshylardy kitap oqýǵa baýlimyz. Máselen, mektep oqýshylary jas erekshelikterine qarai 5 topqa bólingen. Ár topqa oqýy tiis 15 kitaptan usynylǵan. Dál osylai orys synyptaryna da bólek tizim jasalǵan. Onyń ishinde beseýi qazaqstandyq avtorlardyń shyǵarmalary, beseýi Batys, al qalǵan beseýi Shyǵys avtorlarynyń kitaptary. Bul syni oilaýdy qalyptastyrýda óte mańyzdy. Iaǵni mektep oqýshylaryna arnalǵan baǵyttyń ózinde ǵana 150 kitaptyń tizimi bekitilgen», – deidi Baqytjan Turlybekov.
Shara qorytyndysynda eki jaqty memorandýmǵa qol qoiylyp, qos tarap birlesip jumys isteýge ýaǵdalasty. Osyǵan orai Marat Eleýsizuly oblystyq mádeniet, arhivter jáne qujattama, ishki saiasat, bilim jáne jastar saiasaty basqarmalaryna arnaiy mindetter júktedi. Óńirde kitap oqý mádenietin damytý, halyqtyń, ásirese balalar men jastardyń kitapqa degen qyzyǵýshylyǵyn arttyrý, oqyrman qaýymdastyǵyn qalyptastyrý jáne birlesken mádeni-aǵartýshylyq jobalardy júzege asyrýda qarqyndy jumys isteý keregin basa aitty.
Qoǵamdaǵy keseldiń kóbi rýhani toqyraýdan bolady. Al adamdy kemeldik pen tereń paiymǵa jeteleitin basty qural – kitap. Sondyqtan atalǵan bastama shyǵarma oqýmen ǵana shektelmeidi. Bul qoǵamdaǵy ózekti máselelerdi sheshýge yqpal etetin mańyzdy joba bolmaq.
