Memleket basshysy Qasym-Jomart Toqaev Ózbekstan prezidenti Shavkat Mirziioevpen telefon arqyly sóilesip, ekijaqty yntymaqtastyqtyń ózekti máselelerin talqylady, dep habarlaidy dalanews.kz.
Áńgime barysynda eki el basshysy qazaq-ózbek qarym-qatynasynyń joǵary qarqynmen damyp kele jatqanyn atap ótti.
Prezidentter biyl sáýir aiynda Buharada ótken kezdesýde qol jetkizilgen kelisimderdi is júzinde júzege asyrý máselelerine erekshe nazar aýdardy. Sondai-aq ekijaqty yntymaqtastyqty odan ári nyǵaitý joldary talqylandy.
Taraptar prezident ákimshilikteri, úkimetter men salalyq vedomstvolar arasyndaǵy belsendi bailanystardyń mańyzyn atap ótip, birlesken bastamalardy ilgeriletý úshin ózara is-qimyldy jalǵastyrýǵa ýaǵdalasty.
Budan bólek, Qasym-Jomart Toqaev pen Shavkat Mirziioev óńirlik jáne halyqaralyq kún tártibindegi negizgi máseleler jóninde pikir almasyp, aldaǵy ekijaqty is-sharalardyń kestesin qarastyrdy.
