Elimizdegi joǵary oqý oryndarynyń arasynda alǵashqylardyń biri bolyp diplom tapsyrý rásimin bastaǵan I. Jansúgirov atyndaǵy Jetisý ýniversiteti taǵy bir mańyzdy kezeńdi abyroimen ótkerýde. Bul – oqý ornynyń bilim berý úderisin tiimdi uiymdastyryp, túlekterdiń jańa ómir jolyna ýaqytyly qadam basýyna jaǵdai jasap otyrǵanynyń aiqyn kórinisi, dep habarlaidy dalanews.kz.
Biyl diplom tabystaý rásimderi ýniversitettiń 6 fakýltetinde jáne Jansúgirov kolledjinde uiymdastyrylýda. Saltanatty sharalar tolyq jóndeýden ótken, zamanaýi tehnikalyq quraldarmen jabdyqtalǵan Q.Ajmaǵanbetov atyndaǵy Zhetysu Hall kesheninde ótýde. Oblys deńgeiinde uiymdastyrylyp otyrǵan bul mańyzdy is-shara óńirdiń qoǵamdyq-saiasi jáne áleýmettik ómirindegi aitýly oqiǵalardyń birine ainaldy.
Jetisý ýniversitetin 2025–2026 oqý jylynda bakalavriat jáne magistratýra baǵdarlamalary boiynsha jalpy 2026 túlek támamdady. Olardyń 133-i úzdik diplom iegeri atansa, 270 magistrantqa magistr akademiialyq dárejesi berildi.
Saltanatty diplom tabystaý rásimderine ýniversitet rektory Ermek Bóribaev, Jetisý oblysynyń prokýrory Baýyrjan Jumaqanov, Jetisý oblysy ákiminiń orynbasary Marlen Kólbaev, Jetisý oblysynyń Ádilet departamentiniń basshysy Jandos Beksultanuly, Taldyqorǵan qalasynyń ákimi Ernat Bázil jáne óńirdegi memlekettik organdardyń, quqyq qorǵaý qurylymdarynyń, bilim berý uiymdarynyń basshylary, jumys berýshiler men áleýmettik seriktester qatysýda. Jas mamandarǵa diplomdardy qoǵamda ózindik orny bar, el damýyna úles qosyp júrgen bedeldi tulǵalardyń tabystaýy saltanatty sharanyń mańyzyn arttyra tústi.
Qonaqtar túlekterdi ómirlerindegi mańyzdy belespen quttyqtap, olardyń kásibi jolda tabysqa jetip, elimizdiń órkendeýine óz úlesterin qosatynyna senim bildirdi.
Diplom tapsyrý rásiminde ýniversitettiń qoǵamdyq ómirine belsendi qatysqan stýdentter de arnaiy marapattarǵa ie boldy. Birqatar túlek «Belsendi qoǵamdyq qyzmeti úshin» jáne «Úzdik túlek» tósbelgilerimen marapattalsa, sport salasynda joǵary nátijeler kórsetken stýdentterge «Sporttaǵy jetistigi úshin» tósbelgileri tabystaldy.
Jetisý ýniversiteti túlekteriniń eńbek naryǵyndaǵy suranysy jyl saiyn artyp keledi. Ótken oqý jylynda ýniversitetti 1432 jas maman bitirse, olardyń 85 paiyzy turaqty jumyspen qamtyldy. Bul kórsetkish oqý ornynda daiarlanatyn mamandardyń sapasyn, bilim berý baǵdarlamalarynyń eńbek naryǵy talaptaryna sáikestigin jáne jumys berýshilermen tiimdi bailanystyń nátijesin aiǵaqtaidy.
Búginde Jetisý ýniversiteti óńirdiń ǵana emes, elimizdiń áleýmettik-ekonomikalyq damýyna úles qosatyn básekege qabiletti mamandar daiarlaityn jetekshi joǵary oqý oryndarynyń birine ainaldy. Jýyrda jariialanǵan Qazaqstan Respýblikasy joǵary oqý oryndarynyń suranysqa ieliginiń táýelsiz reitingi – 2026 qorytyndysy boiynsha I. Jansúgirov atyndaǵy Jetisý ýniversiteti ulttyq jáne aimaqtyq joǵary oqý oryndary arasynda TOP-20 qataryna enip, 11-oryndy ielendi.
Diplom – jai ǵana qujat emes. Ol – stýdenttiń jyldar boiǵy eńbeginiń nátijesi, ata-ananyń aq úmiti men ustazdardyń tynymsyz eńbeginiń jemisi. Endi jas mamandardyń aldynda jańa múmkindikter men úlken jaýapkershilikke toly ómir joly bastalady. Jetisý ýniversiteti túlekterine aq jol tilep, olardyń el damýyna eleýli úles qosatyn bilikti maman, sanaly azamat bolyp qalyptasatynyna senim bildiredi.
