Kópshilik asyǵa kútetin «Qymyzmuryndyq – 2026» merekesi 27 maýsym kúni Kegen aýdanyndaǵy Qarqara jailaýynda ótedi. Atalmysh shara abyz baba Álmerek Janshyqulynyń 368 jyldyǵymen qatar uiymdastyrylmaq. Merekege elimizden, Túrkiia, Ázirbaijan, Qyrǵyzstan, Qytai, Túrkmenstan, Ózbekstan, Qaraqalpaqstan Respýblikasy jáne ózge memleketterden 35 myńǵa jýyq qonaq keledi dep josparlanyp otyr, dep habarlaidy dalanews.kz.
Qymyzmuryndyq – qazaq halqynyń atadan balaǵa mura bolyp kele jatqan igi dástúrleriniń biri. Bul – qonaqjailylyqty, jomarttyqty, yntymaq pen birlikti dáripteitin mereke. Atalmysh sharanyń týrizmdi damytýǵa da yqpaly mol bolmaq.
Qarqara jailaýynda bul mereke buǵan deiin tórt ret uiymdastyrylǵan. Ótken jyly sharaǵa 8 myńnan astam adam qatysyp, 40 kiiz úi tigilgen. Sondai-aq 250-ge jýyq shaǵyn biznes ókilderi tartylǵan bolatyn. Al biyl 80-nen astam kiiz úi tigilip, kelýshiler sany birneshe esege artady dep kútilýde.
«Qamyzmuryndyq – 2026» mádeni-kópshilik jáne sporttyq is-sharasy aiasynda ulttyq dástúrler men oiyndar pash etilip, qolóner kórmesi uiymdastyrylady. Atap aitqanda, at báigesi, qazaq kúresi, qyz qýý, teńge ilý, jamby atý, qoi kóterý syndy saiystar ótedi. Sonymen birge «Topjarǵan» etno-óner ortalyǵynyń shoý baǵdarlamasy, «Tolaǵai» óner ortalyǵynyń qoiylymdary, oblys ónerpazdary men tanymal estrada juldyzdarynyń kontserti kópshilik nazaryna usynylady. Jastar úshin altybaqan, arqan tartys, qol kúres jáne ulttyq oiyndar uiymdastyrylsa, balalarǵa arnalǵan arnaiy aimaqta attraktsiondar, qýyrshaq teatry, qolóner, sýret salý, shahmat jáne toǵyzqumalaq jarystary ótkiziledi.
Qazirgi tańda Qarqara jailaýynda daiyndyq qarqyndy túrde júrgizilýde. Uiymdastyrýshylar báige alańyn retke keltirip, kórermenderge arnalǵan oryndardy ázirlegen. Qonaqtarǵa qolaily jaǵdai jasaý maqsatynda barlyq uiymdastyrý sharalary josparly túrde júzege asyrylýda.
