Aqtóbede bes qabatty turǵyn úidegi gazdyń atylýyna ne sebep bolǵany tekserilip jatyr. Úsh podezdegi 45 páterdiń turǵyndaryn shańyraǵyna ázirge jolatpaýda. Sebebi jarylystan joǵary qabattardyń arasyndaǵy plita qulap, alty baspananyń qabyrǵasy qaqyraǵan. Al jarylys bolǵan páterdiń iesi qaza tapqan, dep habarlaidy Dalanews.kz.
KTK telearnasynyń habarlaýynsha, Aqtóbeniń qaq ortasynda ornalasqan bes qabaty turǵyn úidiń tórtinshi qabatyndaǵy páterde 4 maýsymda keshke gaz jaryldy. Baspanasyna kúrdeli jóndeý júrgizbek bolǵan sol shańyraqtyń 36 jastaǵy iesi qaza tapty. Páterin jóndep jatqan marqum "gaz ballonyn qoldanýy múmkin" degen boljam bar.
Al kórshileri úreiden áli seiile almai, aman qalǵanyna shúkir aityp otyr. Sábila Tirjanova:
"Jarylys bolǵanda men as úide boldym. Tars etken dybystan shoshyp kettim. Shyǵyp suraiyn desem, esik ashylǵan joq, terezege baryp aiqailaimyn. Adam tolyp tur. "Ne boldy? Men shyǵa almai jatyrmyn" dedim. Sosyn kórshilerge aiqailasam, olar daýystap jylap jatyr".
Jarylys kúshiniń myqty bolǵany sonshalyq, qarsy bettegi kórshi úilerdiń de terezesi shytynap, aýladaǵy kólikterge zaqym kelgen. Úidi tolyq zerttep bolmaiynsha, 45 páterdiń turǵyndary úiine kire almaidy. Jarylys bolǵan podezdegi páterler onsyz da turýǵa kelmeidi. Ákimdik ýaqytsha turýǵa jataqhana bergen. Onda tek 11 adam túnep shyǵypty. Qalǵany týystaryna ketken.
Jaqsylyq Tańatarov, Aqtóbe qalasy otbasyn qoldaý ortalyǵynyń basshysy:
"Túngi 11 shamasynda órt bolǵan úidiń otbasylaryn, 11 adamdy jataqhanaǵa ornalastyrdyq. Qazir jaǵdaiy jaqsy. Túnde osy jerde kezekshiler, meiirbikeler, dárigerler boldy. Tamaǵy, qajet qural jabdyq berildi. Qalǵany túnde týystaryna ketti".
Shańyraǵynyń qabyrǵasy opyrylyp, tóbesi ortasyna túsken turǵyndar endi "dalada qalamyz ba" dep qorqyp otyr
