Búgin Qazaqstan musylmandary dini basqarmasynyń tóraǵasy Naýryzbai qajy Taǵanuly respýblikalyq bas meshitte ait namazyn júrgizip, jamaǵatqa ýaǵyz aitty, dep habarlaidy Dalanews.kz.
"Alla Taǵala pendeleriniń izgilik amal atqaryp, kóbirek saýap ister jasaýy úshin keibir kúnder men túnderdi basqalarynan artyq etip qoidy. Sondai musylman balasynyń Jaratýshysynyń keshirimine bólenýge tyrysyp, izgi amaldarǵa erekshe ynta tanytýy qajet ýaqyttyń biri – osy Qurban ait merekesiniń kezeńi. Bul ai musylman kúntizbesinde zulhijja aiy dep atalady. Zulhijja aiy musylmandar úshin asa qurmetti de jáne ardaqty ailardyń biri. Bul aidyń alǵashqy on kúninde jasalatyn ǵibadattardyń qadiri óte joǵary. Alla Taǵala qasietti Qurannyń "Fájr" súresiniń alǵashqy eki aiatynda: "Tań shapaǵyna sert. Jáne (múbárák) on túnge sert", – dep aitqan. Ardaqty Paiǵambarymyz (oǵan Allanyń salaýaty men sálemi bolsyn) zýlhijja aiynyń alǵashqy on kúni jaiynda: "Alla Taǵalaǵa osy (on) kúnde istelgen igi isten jaqsyraq amal joq" (imam Buhari)", - dep atap ótti Naýryzbai qajy Taǵanuly.
Ait namazynan keiin Bas múfti elimizdiń tynyshtyǵy men bolashaǵy úshin duǵa jasap, ata-babalar rýhyna Quran aiattaryn baǵyshtady.
Aita ketsek, Qurban ait namazy elimizdiń ár óńirinde tańǵy saǵat 06-00 men 07-00 arasynda oqyldy. Máselen, Astanada ait namazy saǵat 06-00-ge kelse, al batys óńirlerde ol 06-30, ShQO men Abai oblysynda 07-00-de oqyldy.
