Qazaqstan jastar quramasynyń aǵa jattyqtyrýshysy, Olimpiada chempiony Baqyt Sársekbaev áleýmettik jelide ózine qysym jasalyp jatqanyn málimdedi. Onyń aitýynsha, belgisiz adamdar jattyqtyrýshylyq qyzmetine aralasyp, jumys protsesine kedergi keltirýge tyrysyp júr, dep habarlaidy dalanews.kz.
Instagram paraqshasynda jariialaǵan jazbasynda Baqyt Sársekbaev eshqandai qysymǵa nemese arandatýǵa boi aldyrmaitynyn aityp, óz jumysyna bóget jasamaýǵa shaqyrdy.
“Synbaimyn ǵoi. Syndyra almaisyńdar ǵoi! Eshqashan da bailanystaryńmen, telefonmen, provokatsiiamen qorqyta almaisyńdar! Men júrgen jerde tek qana tártip, distsiplina, ádildik bolady! Men eshteńe suraǵan emespin, bar surarym jumys isteýge kedergi keltirmeńder! Maǵan kedergi jasaý – qazaq boksyna kedergi jasaý! Meniń intriga, provokatsiiaǵa ýaqytym joq, aldymyzda jaýapty báseke tur! Keibireýlerge eskertý!”, - dep jazdy ol.
Dalanews.kz tilshisi mán-jaidy naqtylaý úshin Baqyt Sársekbaevpen bailanysqa shyqty. Onyń sózinshe, ázirge bolǵan oqiǵanyń barlyq jai-japsaryn jariialaýǵa jáne naqty adamdardyń esimin ataýǵa erte.
“Qazir tolyq aita almaimyn. Bul máselege qatysty federatsiiaǵa resmi túrde júgindim. Eger másele sheshilmese, keiin bárin ashyq aitamyn. Ázirge esimderin ataǵym kelmeidi”, – dedi ol.
Sársekbaevtyń aitýynsha, daý jattyqtyrýshylyq jumysyna syrttan aralasý áreketterine bailanysty týyndaǵan.
“Meniń jattyqtyrýshylyq jumysyma aralasyp, jumys protsesin buzýǵa, ujymdaǵy turaqtylyqty shaiqaýǵa áreket jasaldy. Qazir másele federatsiianyń qaraýynda”, – dedi Baqyt Sársekbaev.
