"5-nen 6 maýsymǵa qaraǵan túni el ortalyǵy jáne soltústiktegi halyq, onyń ishinde Astana, Qaraǵandy, Pavlodar jáne Qostanai qalalarynyń turǵyndary aspanda jaryq qubylysty baiqady. Aldyn ala málimetter boiynsha, bul orbitada buryn bolǵan ǵarysh nysandarynyń biriniń atmosferaǵa enýimen bailanysty", delingen ministrlik túsiniktemesinde.
Ǵaryshtyq qaldyqtardyń qozǵalysyn baqylaityn halyqaralyq uiymdardyń derekterine sáikes, dál osy ýaqyt aralyǵynda úsh oqiǵa tirkelgen, olardyń árqaisysy baiqalǵan qubylysty týdyrýy múmkin:
1. Qytaidyń ZQ-2E zymyranynyń údetkish blogy
- Atmosferaǵa ený ýaqyty: 5 maýsym, Astana ýaqytymen shamamen 22:40.
- Nysan: LandSpace kompaniiasy 17 mamyrda ushyrǵan Zhuque-2 Enhanced zymyranynyń satysy.
- Ereksheligi: Ekologiialyq taza otyn (suiyq metan men ottegi) paidalanylady, janý kezinde aiqyn jaryq shyǵarady.
Bul nysan ýaqyt jaǵynan jáne kórinis sipattamasy boiynsha Qazaqstan turǵyndarynyń baiqaǵan qubylysyna eń dál sáikes keledi.
2. STARLINK-1631 (SpaceX) spýtnigi
- Atmosferaǵa ený ýaqyty: 6 maýsym, Almaty ýaqytymen 03:41.
- Eski spýtnikterdiń biriniń josparly orbitadan shyǵýy.
3. Japondyq H-2A R/B zymyranynyń údetkish blogy
- Atmosferaǵa ený ýaqyty: 6 maýsym, Almaty ýaqytymen 00:36.
- Nysan passivti orbitadan shyǵý rejiminde bolǵan.
"Qazirgi tańda Qazaqstan Respýblikasy aýmaǵyna qandai da bir fragmentterdiń qulaǵany nemese zalal keltirgeni týraly rastalǵan aqparat joq. Mundai nysandar, ádette, atmosferada tolyq janyp ketedi (iri bólikterdiń Qazaqstan aýmaǵyna qulaýy ekitalai), al qubylystyń ózi kórneki bolǵanymen, qaýipsiz úderis bolyp sanalady", delingen habarlamada.
Sondai-aq, 2025 jyly 5 maýsymda túngi aspanda uzyn-sonar otty beimálim nysan paida bola salysymen, birinshi bolyp Qorǵanys ministrligi de aqparat taratqan edi.
QR Qorǵanys ministrligi aspanda belgisiz nysandardyń paida bolýyna qatysty aqparattyń taralýyna bailanysty tómendegini habarlaidy:
"Qazaqstan Respýblikasy aýmaǵynda áýe keńistigin buzý faktileri tirkelgen joq. Jaǵdai tiisti qyzmetterdiń tolyq baqylaýynda. Halyqqa eshqandai qaýip tónip turǵan joq. Atalǵan qubylys atmosferaǵa enip jatqan ǵaryshtyq apparattardyń qaldyqtaryna nemese meteor aǵynyna uqsaidy. Mundai nysandar, ádette, atmosferanyń tyǵyz qabattarynda janyp ketip, jerge jetpeidi. Azamattardan sabyr saqtaýdy jáne rastalmaǵan aqparat taratpaýdy suraimyz. Quzyrly organdar bul qubylysty zerttep jatyr jáne qajet bolǵan jaǵdaida resmi túsinikteme beredi".
Buǵan deiin elorda turǵyndary aspanda janyp bara jatqan birneshe belgisiz obektiniń zýlap ótkenin videoǵa túsirip alǵanyn jazǵan edik.
