Sherzat Bolattyń ólimine qatysty sot úkimi shyqqan soń sottalýshylar men olardyń týystary narazylyq tanytty, dep habarlaidy Dalanews.kz.
Úkim oqylǵan boida sottalýshylar sot zalyndaǵy áinekti uryp, óz qarsylyqtaryn bildirdi. Sot sheshimimen olardyń ata-analary da kelispeidi. Olar janjaldyń bastalýyna marqum Sherzattyń ákesi Qarjaýbai Nurymov kináli dep sanap, oǵan qarsy aryz jazýǵa nietti ekenin málimdedi.
Sottalýshy Didar Qaliahmettiń ákesi:
«Men Didar Qaliahmettiń ákesimin. Bul jerde eshqandai ádildik bolǵan joq. Zań turǵysynan qaraǵanda, másele durys baǵalanbady. Men, árine, zardap shekkenderdi túsinemin, olardyń balasy qaitys boldy. Biraq meniń ulymnyń esh kinási joq. Negizinde tóbelesti ózderi – zardap shegýshilerdiń jaqtastary bastaǵan. Eger sol kúni Qarjaýbai Nurymov esikti jaýyp, balalardy ishke kirgizbegende, munyń biri de bolmas edi. Qazaqstan da osylai dúrlikpes edi», – dedi.
Al marqum Sherzattyń týystary bolsa sot sheshimine qanaǵattanyp otyr. Bul týraly olardyń advokaty habarlady:
«Sot qalypty, maksimaldy jaza berdi. Memlekettik aiyptaýshy suraǵan merzim tolyq berildi. Ári qarai Qarjaýbai Nurymovtyń ustanymyna qarai áreket etemiz. Eger ol apelliatsiialyq shaǵym túsirý qajet dese, biz sony qoldaimyz», – dedi advokat.
