Aita ketsek, 2025 jyldyń 19 mamyrynda Óskemen turǵyndary sary tumanǵa oranyp, hlordyń ótkir iisine tap bolǵan. Saldarynan qala turǵyndarynyń kóbisi bas ainalý men jalpy aýrýǵa shaǵymdanyp, dárigerge kómegine júgingen. Aldymen atalǵan jaitqa qatysty Óńirlik kommýnikatsiialar qyzmetinde túsinikteme berildi. Olar titan-magnii kombinaty basshylyǵyna silteme jasai otyryp, óndiris ornynda shtattan tys jaǵdailar bolmaǵanyn habarlady. Resmi nusqa boiynsha, kásiporynda hlorlaý qondyrǵysynyń kondensatsiia júiesine jospardan tys tazartý jumystary júrgizilgen. Alaida, oqiǵa ornynan aýany zerttegen ekologtar ruqsat etilgen shekten tys hlordyń mólsherin tirkedi. Sol kezde kásiporynda tekserý júrgiziletini habarlanǵan. 5 maýsymda bul tekserýdiń nátijeleri belgili boldy.
"20 mamyrdan 2 maýsym aralyǵynda júrgizilgen jospardan tys tekserý gaz tazartý jabdyqtaryn durys paidalanbaýdy qosa alǵanda, óreskel buzýshylyqtardy anyqtady. Gaz qubyryn profilaktikalyq tazartý kezinde hlorlaý qondyrǵysynda qysymnyń qysqa merzimdi joǵarylaýy oryn aldy, bul lastaýshy zattardyń tazartý júiesin ainalyp ótip, atmosferaǵa shyǵýyna túrtki boldy. Bul jait shamamen eki saǵatqa sozyldy, muny tergeýge qatysqan ShQO TJD mamandary da rastady", - dedi ShQO Ekologiia departamenti.
"Tekserý nátijeleri boiynsha kásiporynǵa salynǵan aiyppuldyń jalpy somasy shamamen 24 mln teńgeni qurady, sondai-aq anyqtalǵan buzýshylyqtardy joiýǵa nusqama berildi, bolashaqta mundai jaǵdailarǵa jol bermeý úshin arnaiy sharalar ázirlep, qabyldaý usynyldy", dep habarlady vedomstvonyń baspasóz qyzmeti.
Eger nusqama belgilengen merzimde oryndalmasa, departamenttegiler qaita tekserý júrgiziletinin naqtylady.
Buǵan deiin saitymyzda "Senatta Qazaqstannyń tórt óńirinde ekologiiany lastaǵan kompaniialar aty ataldy" degen maqala jariialanǵan bolatyn.
