Almatyda 12 jastaǵy jasóspirimniń ólimine qatysty tergeý jalǵasyp jatyr. Qaiǵyly oqiǵa boiynsha kúdikke ilingen kámeletke tolmaǵan bala mamandandyrylǵan arnaiy mekemege ornalastyryldy, dep habarlaidy dalanews.kz.
Almaty qalasy Politsiia departamentiniń málimetinshe, Túrksib aýdanynda bolǵan oqiǵanyń mán-jaiyn anyqtaý úshin tájiribeli tergeýshiler men jedel ýákilderden arnaiy jedel-tergeý toby qurylǵan. Qazirgi tańda oqiǵa orny men oǵan jaqyn mańdaǵy beinebaqylaý kameralarynyń jazbalary, sondai-aq iske qatysy bolýy múmkin basqa da tsifrlyq derekter muqiiat tekserilip, qylmystyq is materialdaryna tirkelgen.
Almaty qalalyq politsiia departamentiniń resmi ókili Saltanat Ázirbek tergeý aiasynda barlyq boljamdar men nusqalar qaralyp jatqanyn aitty.
"Oqiǵa orny men oǵan irgeles aýmaqtardaǵy beinejazbalar, sondai-aq bolǵan jaǵdaidyń obektivti kórinisin anyqtaýǵa mańyzy bar ózge de tsifrlyq derekter zerttelip, is materialdaryna qosyldy. Barlyq ýájder men nusqalar tekserilip jatyr", – dedi ol.
Aldyn ala málimet boiynsha, aýyr qylmysqa bir kámeletke tolmaǵan jasóspirimniń qatysy bar ekeni anyqtalǵan. Ol ustalyp, mamandandyrylǵan arnaiy mekemege oqshaýlandy.
Politsiianyń habarlaýynsha, eki jasóspirimniń arasynda burynnan kelispeýshilik bolǵan. Olardyń arasyndaǵy janjal ózara arazdyqtan týyndap, arty pyshaq qoldanylǵan qaiǵyly oqiǵaǵa ulasqan.
Saltanat Ázirbektiń aitýynsha, qolda bar beinejazbalar men hat almasýlarǵa sáikes, qaza tapqan jasóspirim kúdiktiniń turǵylyqty jerine ózara máseleni sheshý úshin barǵany aldyn ala anyqtalǵan.
"Qazirgi ýaqytta jábirlenýshi tarapqa istiń barlyq mán-jaiy túsindirildi", – dep tolyqtyrdy politsiia ókili.
Aita keteiik, buǵan deiin Almatyda 12 jastaǵy mektep oqýshysynyń kóptegen pyshaq jaraqatynan kóz jumǵany habarlanǵan edi. Bul iske kúdikti retinde 13 jastaǵy jasóspirim qarastyrylyp jatyr. Marqumnyń jaqyndary kúdiktiniń kámeletke tolmaǵanyna bailanysty onyń zań aldynda tiisti jaýapkershilikke tartylmai qalýy múmkin dep alańdaýly.
