ايتا كەتسەك، 2025 جىلدىڭ 19 مامىرىندا وسكەمەن تۇرعىندارى سارى تۇمانعا ورانىپ، حلوردىڭ وتكىر يىسىنە تاپ بولعان. سالدارىنان قالا تۇرعىندارىنىڭ كوبىسى باس اينالۋ مەن جالپى اۋرۋعا شاعىمدانىپ، دارىگەرگە كومەگىنە جۇگىنگەن. الدىمەن اتالعان جايتقا قاتىستى وڭىرلىك كوممۋنيكاسيالار قىزمەتىندە تۇسىنىكتەمە بەرىلدى. ولار تيتان-ماگنيي كومبيناتى باسشىلىعىنا سىلتەمە جاساي وتىرىپ، ءوندىرىس ورنىندا شتاتتان تىس جاعدايلار بولماعانىن حابارلادى. رەسمي نۇسقا بويىنشا، كاسىپورىندا حلورلاۋ قوندىرعىسىنىڭ كوندەنساسيا جۇيەسىنە جوسپاردان تىس تازارتۋ جۇمىستارى جۇرگىزىلگەن. الايدا، وقيعا ورنىنان اۋانى زەرتتەگەن ەكولوگتار رۇقسات ەتىلگەن شەكتەن تىس حلوردىڭ مولشەرىن تىركەدى. سول كەزدە كاسىپورىندا تەكسەرۋ جۇرگىزىلەتىنى حابارلانعان. 5 ماۋسىمدا بۇل تەكسەرۋدىڭ ناتيجەلەرى بەلگىلى بولدى.
"20 مامىردان 2 ماۋسىم ارالىعىندا جۇرگىزىلگەن جوسپاردان تىس تەكسەرۋ گاز تازارتۋ جابدىقتارىن دۇرىس پايدالانباۋدى قوسا العاندا، ورەسكەل بۇزۋشىلىقتاردى انىقتادى. گاز قۇبىرىن پروفيلاكتيكالىق تازارتۋ كەزىندە حلورلاۋ قوندىرعىسىندا قىسىمنىڭ قىسقا مەرزىمدى جوعارىلاۋى ورىن الدى، بۇل لاستاۋشى زاتتاردىڭ تازارتۋ جۇيەسىن اينالىپ ءوتىپ، اتموسفەراعا شىعۋىنا تۇرتكى بولدى. بۇل جايت شامامەن ەكى ساعاتقا سوزىلدى، مۇنى تەرگەۋگە قاتىسقان شقو تجد ماماندارى دا راستادى"، - دەدى شقو ەكولوگيا دەپارتامەنتى.
"تەكسەرۋ ناتيجەلەرى بويىنشا كاسىپورىنعا سالىنعان ايىپپۇلدىڭ جالپى سوماسى شامامەن 24 ملن تەڭگەنى قۇرادى، سونداي-اق انىقتالعان بۇزۋشىلىقتاردى جويۋعا نۇسقاما بەرىلدى، بولاشاقتا مۇنداي جاعدايلارعا جول بەرمەۋ ءۇشىن ارنايى شارالار ازىرلەپ، قابىلداۋ ۇسىنىلدى"، دەپ حابارلادى ۆەدومستۆونىڭ باسپا ءسوز قىزمەتى.
ەگەر نۇسقاما بەلگىلەنگەن مەرزىمدە ورىندالماسا، دەپارتامەنتتەگىلەر قايتا تەكسەرۋ جۇرگىزىلەتىنىن ناقتىلادى.
بۇعان دەيىن سايتىمىزدا "سەناتتا قازاقستاننىڭ ءتورت وڭىرىندە ەكولوگيانى لاستاعان كومپانيالار اتى اتالدى" دەگەن ماقالا جاريالانعان بولاتىن.
