Qazaqstanda 2025 jylǵy kóktemgi egis jumystary tolyq aiaqtaldy. Memlekettik qoldaý sharalarynyń, diqandar men jergilikti ákimshiliktiń úilesimdi jumysynyń arqasynda egis der kezinde júrgizildi. Salalyq ministrlik málimetterine sáikes, aýyl sharýashylyǵy daqyldary 23,7 mln gektar jerge egilip, sebildi, dep habarlaidy Dalanews.kz.
"Sonymen qatar, egistik alqaptardyń qurylymyn ártaraptandyrýǵa erekshe nazar aýdaryldy. Bul rette egin ainalymynyń ǵylymi negizdelgen normalary, klimattyq táýekelderge tózimdilik jáne naryqtyq úrdister eskerildi", delingen vedomstvo habarlamasynda.
Nátijesinde, ónimdiligi joǵary jáne suranysqa ie daqyldardyń egis kólemi ulǵaidy:
- maily daqyldar – 3,4 mln gektar (ótken jylmen salystyrǵanda 0,5 mln gektarǵa artyq),
- mal azyqtyq daqyldar – 3,3 mln gektar (114 myń gektarǵa artty),
- dándik júgeri – 167,5 myń gektar, kókónis-baqsha daqyldary – 222,3 myń gektar.
"Atalǵan egis alqaptary eldiń ishki qajettilikterin qamtamasyz etip qana qoimai, agroónerkásiptik keshenniń eksporttyq áleýetin arttyrýǵa múmkindik beredi", - deidi AShM baspasóz qyzmeti.
Aita ketý kerek, biyl egis jumystaryn qarjylandyrý alǵash ret dala jumystary bastalǵanǵa deiin alty ai buryn bastaldy. Jalpy qarjylandyrý kólemi 700 mlrd teńgeni qurady. Diqandardyń jeńildetilgen qarjyǵa qoljetimdiligin arttyrý maqsatynda qaryz somasynyń 85%-na deiin kepildik berý mehanizmi iske qosyldy.
Aýyl sharýashylyǵy tehnikasyn jeńildetilgen lizing arqyly alý kólemi 250 mlrd teńgeni qurady. Bul mashina-traktor parkin jańartýǵa jáne kóktemgi dala jumystaryn agrotehnikalyq merzimderde, joǵary tehnologiialyq tiimdilikpen júrgizýge eleýli áser etti.
Buǵan deiin saitymyzda "Fermerlerge sýbsidiia, Otbasy bank salymshylaryna memsyilyq joq". Úkimet sandyraǵy shynǵa ainalýda" degen maqala jariialanǵan bolatyn.
