Áleýmettik jeli qoldanýshylarynyń biri Air Astana áýe kompanıasynyń bólimshesinde qazaq tiliniń qoldanylmaýyna qatysty shaǵymdandy. Onyń aıtýynsha, aqparat taqtalary men jazbalarda memlekettik til eskerilmegen, dep habarlaıdy Dalanews.kz.

Jeli qoldanýshysynyń sózinshe, Ystanbul áýejaıyndaǵy Air Astana bólimshesinde aqparat birneshe tilde berilgen. Alaıda onyń reti saqtalmaǵan, keıbir jazbalarda qazaq tili múlde qoldanylmaǵan.

“Úsh tilde jazyp qoıypty. Qazaqtarǵa qyzmet kórsetpeıdi-aý dep oıladym. Birinshi túrikshe, ekinshi qazaqsha, úshinshi aǵylshynsha jazyp qoısa túsinetin edim. Bul reseılik emes, ózimizdiń qazaqstandyq kompanıa emes pe?

Odan bólek regıstrasıa jasaıtyn jerde tablolarynda aǵylshynsha jáne oryssha jazyp qoıypty. Qanym qaraıǵany-aı”, - dep jazdy Zhaksytaev esimdi jeli qoldanýshysy.

Rasymen, avtor jelide jarıalaǵan aqparattyq taqtada qazaq tili qoldanylmaǵany kórinedi. Bul jaıt áleýmettik jelide qyzý talqylanyp jatyr. 

Aıta keteıik, Qazaqstanda memlekettik til –qazaq tili. Sondyqtan qoǵamda otandyq kompanıalar, ásirese ulttyq tasymaldaýshylar qyzmet kórsetý barysynda qazaq tiline basymdyq berýi kerek degen talap jıi kóteriledi.

Qazirgi ýaqytta Air Astana atalǵan jaǵdaıǵa qatysty resmı túsinikteme bergen joq.