Bas prokýratýra Epshtein isine qatysty jariialanǵan qujattardy zerttep jatyr. Vedomstvo bul derekter arasynda Qazaqstan azamattarynyń aty-jóni bar-joǵyn anyqtaýǵa kirisken, dep habarlaidy Dalanews.kz.
Tengrinews.kz jariialaǵan videoda bas prokýrordyń orynbasary Erlan Ótegenov zerttelip jatqan málimetterdiń kólemi óte aýqymdy ekenin atap ótti. Qujattarda 3 millionnan astam habarlama bar.
"Olar tolyq emes, úzik-úzik málimetter. Qazir Qazaqstan azamattarynyń qatysy bar-joǵyn, sondai-aq elimizge qatysty qandai da bir málimetterdiń bar-joǵyn muqiiat qarap jatyrmyz", – dedi ol.
Eske salaiyq, buǵan deiin Májilis depýtaty Ashat Rahymjanov Bas prokýratýra men UQK-den Djeffri Epshteinniń faildarynda aty atalǵan barlyq qazaqstandyqty, sondai-aq olarmen bailanysy bolýy múmkin tulǵalardy tekserýdi surady. Depýtat bul kezdesýlerdiń sipatyn anyqtaýdy talap etken edi.
Onyń aitýynsha, qupiia aqparattyń, sonyń ishinde memlekettik qupiialardyń syrtqa shyǵý qaýpin joqqa shyǵarýǵa bolmaidy. Depýtattyq saýal 25 aqpanda Berik Asylovqa jáne UQK tóraǵasy Ermek Saǵymbaevqa joldanǵan.
Rahymjanovtyń sózinshe, damyǵan demokratiialyq elderde bul daýǵa qatysy bar tulǵalarǵa qatysty parlamenttik tergeýler men qylmystyq qýdalaý bastalyp ketken.
"Muny jabýly qazan kúiinde qaldyrýǵa bolmaidy. Qujattarda "Eski Qazaqstannyń" joǵarǵy eshelonynda bolǵan, mańyzdy memlekettik qyzmet atqarǵan adamdar atalady. Bul endi olardyń jeke ómiri emes, memlekettiń qaýipsizdigi men eldiń bedeline qatysty másele. Mysaly, burynǵy premer-ministr ári UQK-niń eks-tóraǵasy Kárim Másimovjazbalarda keminde segiz ret kezdesedi", – dedi depýtat.
