Qaraǵandy oblysynda joǵalǵan 13 jastaǵy Rys Bibarys Beknuruly aman-esen tabyldy, dep habarlaidy Dalanews.kz.
Qazir onyń ómiri men densaýlyǵyna qaýip tónip turǵan joq.
Tótenshe jaǵdailar ministrligi málimetinshe, mobildi toptar balany Abai qalasynan 15 shaqyrym qashyqtaǵy daladan tapqan, oǵan meditsinalyq kómek qajet bolmaǵan.
"Aldyn ala málimet boiynsha jasóspirim dostarymen birge Abai qalasynan Qarabas kenti baǵytyna jaiaý shyqqan. Qarabas kentindegi temirjol ótkeli mańynda balalar ekige bólinip, eki jasóspirim úilerine ózderi qaitqan. Týystarynyń sózinshe, bala sońǵy ret shamamen saǵat 20:00-de anasyna habarlasyp, baǵdarynan adasyp qalǵanyn aitqan", - dedi TJD ókilderi.
Buǵan deiin áleýmettik jelide onyń aýdiohabarlamasy tarady. Ol anasynan kómek surap, 60 sekýndy qalǵanyn aitqan edi. Al Ishki ister ministrligi balany izdestirip jatqanyn málimdedi.
