Soltústik Qazaqstan oblysyn 225 mln teńge kólemindegi biýdjet qarajaty negizsiz jumsalmaq bolǵan, dep habarlaidy Dalanews.kz.
Memlekettik satyp alý salasyndaǵy zańnama talaptarynyń saqtalýyn qamtamasyz etý maqsatynda prokýratýra organdary tarapynan quqyq buzýshylyqtardy anyqtaý jáne olardyń jolyn kesý boiynsha júieli jumystar júrgizilýde.
Júrgizilgen taldaý barysynda «Memlekettik satyp alý týraly» Qazaqstan Respýblikasynyń Zańynyń talaptaryn óreskel buzý faktileri anyqtaldy.
Atap aitqanda, Jambyl aýdanynda aýdandyq Ekonomika jáne qarjy bóliminiń laýazymdy tulǵalary Zań talaptaryn buza otyryp, tiisti jer ýchaskelerine quqyq belgileitin qujattar bolmaǵanyna qaramastan, kóshe-jol jelisin ortasha jóndeý boiynsha 213,8 mln teńge somasyna memlekettik satyp alýlardy júzege asyrǵan.
Taiynsha aýdanynda Bilim bólimi tarapynan pedagog qyzmetkerlerdiń meditsinalyq tekserýlerin ótkizý qyzmetterin 13 mln teńge somasyna satyp alý júrgizilgen. Alaida atalǵan satyp alýǵa Qazaqstan Respýblikasy Densaýlyq saqtaý ministrliginiń 2020 jylǵy 15 qazandaǵy № QR DSM-131/2020 buiryǵymen kózdelmegen dárigerlerdiń (terapevt, dermatovenerolog, nevropatolog) tekseristeri, sondai-aq zerthanalyq zertteýler men qaraý kabinetiniń qyzmetteri engizilgen.
Prokýrordyń narazylyqtary boiynsha joǵaryda atalǵan memlekettik satyp alýlardyń kúshi joiyldy, kináli laýazymdy tulǵalardy zańda belgilengen jaýapkershilikke tartý boiynsha sharalar qabyldanýda.
Jalpy, aǵymdaǵy jyldyń basynan beri atalǵan salada prokýrorlar 17 memlekettik satyp alýdy toqtatty, nátijesinde somasy 225 mln teńge kólemindegi biýdjet qarajatynyń negizsiz jumsalýyna jol berilmedi.
