Oblys ákimi Berik Ýáli Semei qalasyndaǵy kóshelerde júrgizilip aǵymdaǵy jóndeý jumystarynyń barysymen tanysty. Qazirgi ýaqytta oblys ortalyǵyndaǵy birneshe kósheniń joldary retke keltirilip, asfalt tóselip jatyr, dep habarlaidy Dalanews.kz.
Semei qalasynda jalpy uzyndyǵy 756 shaqyrymdy quraityn 1179 kóshe bar. Abai oblysy qurylǵanǵa deiin qalalyq joldardyń tek 36 paiyzy ǵana asfaltty beton jabynymen qamtylǵan bolatyn. 2025 jyldyń qorytyndysy boiynsha asfalttaý deńgeii 50 paiyzǵa jetkizildi. Qaladaǵy jol infraqurylymyn damytý jáne kóshe-jol jelisiniń sapasyn arttyrý maqsatynda 2026 jylǵa keshendi is-sharalar jospary ázirlendi. Aimaq basshysy Mirjaqyp Dýlatov jáne Qaiym Muhamedhanov kósheleriniń qiylysyndaǵy jolda júrgizilip jatqan aǵymdaǵy jóndeý jumystaryn kórdi. Merdigerlerge jumysty merziminde ári sapaly aiaqtaýdy tapsyrdy. Jolaýshylar kóligi jáne avtomobil joldary basqarmasyna jáne qala ákimine Ulttyq sapa ortalyǵy mamandarymen birlesip jol sapasyn turaqty baqylaýda ustaý qajettigin aitty. Oblys ákimi biyl Semeidi abattandyrýǵa airyqsha kóńil bólinetinin, qaladaǵy 100 kóshege asfalt tóseý josparlanyp otyrǵanyn jetkizdi. Buryn asfalt tóselmegen kósheler men aýla aýmaqtaryna basymdyq beriledi.
«Basty maqsat – turǵyndarǵa qolaily jaǵdai jasaý. Asfalt sapasyna erekshe mán berý qajet. Halyq bárin kórip otyr. Joldardy jóndeýge qarajat bólindi. Endi naqty nátije talap etiledi. Barlyǵy kepildik talaptaryna sai qadaǵalanady. Byltyr 40 aýlaǵa asfalt tóselse, biyl ony eki jarym esege kóbeitip, 100 aýlaǵa asfalt tósemekpiz. Ótken jyly 52 kósheni ortasha jóndeýden ótkizsek, biyl sony eki eselep, 100 kóshege ortasha jóndeý júrgizemiz. Byltyr Semeide 35 aýla abattandyrsaq, sony 3 esege kóbeitip, 100 aýlany abattandyrǵaly otyrmyz. 2025 jyly 15 kóshe jaryqtandyrylǵan bolsa, biyl ony alty jarym esege kóbeitip, 100 kósheni jaryqtandyramyz. Mundai aýqymdy jumys Semeide buryn sońdy bolmaǵan», – dedi Berik Ýáli.
Aimaq basshysy sondai-aq, joldyń sapasyna qoǵamdyq baqylaý ornatýdyń mańyzdy ekenin atap ótip, qoǵamdyq keńes músheleri men partiia ókilderiniń bul iske belsendi atsalysýy kerek ekenin aitty.
