Jetisý oblysynda Ulttyq dombyra kúni keń kólemde atalyp ótti. Óńirdiń túkpir-túkpirinde ulttyq ónerdi ulyqtap, turǵyndarǵa erekshe rýhani áser syilaǵan merekelik is-sharalar uiymdastyryldy. Osylaisha óńirde 1055 dombyrashy merekelik sherýlerge qatysyp, bir mezette belgili kúilerdi oryndady, dep habarlaidy dalanews.kz.
Panfilov aýdanynda 5000 dombyrashynyń qatysýymen sherý uiymdastyrylyp, ulttyq kúi ónerin ulyqtaýǵa baǵyttalǵan jarqyn kontserttik baǵdarlama usynyldy.
Eskeldi aýdanynda 300 dombyrashy «Dombyra – Uly dalanyń úni» atty is-shara aiasynda merekelik sherýge qatysyp, bir mezette kúi oryndady.
Al Sarqan aýdanynda Ulttyq dombyra kúnine arnalǵan aýqymdy is-shara Sarqan qalasynda ótti. Qala kóshelerinde kúiler men dástúrli ánder oryndalyp, 255 dombyrashy qatysqan sherý ortalyq bazar alańynda jalǵasyp, turǵyndar men qala qonaqtaryna arnalǵan kontserttik baǵdarlamaǵa ulasty.
Eske salsaq, buǵan deiin Taldyqorǵan qalasynda Ulttyq dombyra kúnine orai Muqan Tólebaev atyndaǵy orkestrdiń mýzykanttary tikelei efirde álemniń 10 eli men respýblikalarynan dombyrashylarymen birge Nurǵisa Tilendievtiń «Álqisa» kúiin bir mezette oryndaǵan bolatyn. Sharaǵa tikelei efir arqyly Qytai, AQSh, Túrkiia, Belgiia, Túrikmenstan, Qyrǵyzstan, Ózbekstan, Tájikstan, Bashqurtstan jáne Altai ólkesinen dombyrashylar qatysyp, osylaisha qazaqtyń kúi óneriniń sheberleri men janashyrlaryn bir arnaǵa toǵystyrdy.
