Qazaqstannyń birqatar óńirinde 1–3 shilde aralyǵynda balalardyń qaýipsizdigin qamtamasyz etýge baǵyttalǵan aýqymdy profilaktikalyq is-sharalar ótti. Reidterge shamamen 3 myń politsiia qyzmetkeri jumyldyryldy, dep habarlaidy dalanews.kz.
Tekserý jumystary Almaty, Shymkent qalalarynda, sondai-aq Almaty, Jambyl, Mańǵystaý, Pavlodar, Soltústik Qazaqstan, Qyzylorda oblystarynda, Abai jáne Ulytaý oblystarynda júrgizildi.
Is-sharalar barysynda politsiia bólimshelerine 2400-den astam kámeletke tolmaǵan jetkizildi. Onyń ishinde 1500-den astamy ákimshilik quqyq buzýshylyq jasaǵany úshin, al 1000-ǵa jýyǵy qaraýsyz jáne qadaǵalaýsyz júrgeni úshin anyqtalǵan.
Jalpy 4 myńǵa jýyq ákimshilik quqyq buzýshylyq tirkeldi. Sonymen qatar, 257 ata-ana balalaryn tárbieleý mindetin tiisinshe oryndamaǵany úshin jaýapkershilikke tartyldy. Taǵy 1500-ge jýyq ata-ana balalarynyń túngi ýaqytta kóshede nemese oiyn-saýyq oryndarynda júrgeni úshin ákimshilik jaýapqa tartylǵan.
IIM málimetinshe, profilaktikalyq is-sharalar ótken kezeńde atalǵan óńirlerde kámeletke tolmaǵandardyń qatysýymen birde-bir qylmys tirkelmegen.
