Senatta depýtattyq saýal joldaǵan senator Amangeldi Nuǵmanov Qazaqstanda zeinetaqy júiesin ózgertip, ony eńbek ótiline negizdeý máselesin kóterdi, dep habarlaidy Dala News.
Senatordyń aitýynsha, qazirgi zeinetaqy júiesi negizinen jasqa bailanysty qalyptasqan jáne ol búgingi eńbek naryǵynyń shynaiy jaǵdaiyna tolyq sáikes kelmeidi. Sondyqtan ol kezeń-kezeńimen eńbek ótiline negizdelgen modelge kóshýdi usyndy.
Nuǵmanovtyń pikirinshe, mundai júie azamattarǵa zeinetke shyǵý ýaqytyn ózderi anyqtaýǵa múmkindik beredi. Iaǵni, qajetti eńbek ótilin jinaǵan adam ózi sheshim qabyldap, zeinetke shyǵa alady.
Sonymen qatar senator bul ózgerister birqatar áleýmettik máselelerdi sheshýge yqpal etetinin atap ótti. Atap aitqanda, jumyssyzdyq deńgeiin tómendetý, azamattardyń eńbekke degen jaýapkershiligin arttyrý jáne biýdjetke túsetin júktemeni azaitý kózdeledi.
Budan bólek, depýtat zeinetaqy júiesinde mańyzdy olqylyq bar ekenin aitty. Qazirgi zańnamada densaýlyǵyna bailanysty eńbekke jaramsyz bolǵanymen, múgedektik rásimdei almaǵan azamattarǵa erte zeinetke shyǵý múmkindigi qarastyrylmaǵan.
Osyǵan bailanysty senator meditsinalyq kórsetkishter boiynsha zeinetke shyǵý tetigin engizýdi usyndy. Iaǵni, arnaiy aýrýlar tizimi negizinde azamattarǵa zeinetaqy alý quqyǵyn berý qajet dep esepteidi.
Senator usynystardy jan-jaqty talqylaý úshin memlekettik organdar, sarapshylar jáne qoǵamdyq uiymdar qatysatyn arnaiy jumys tobyn qurýdy da usyndy.
Onyń pikirinshe, bul ózgerister zeinetaqy júiesiniń turaqtylyǵyn qamtamasyz etip, ony qazirgi áleýmettik-ekonomikalyq jaǵdaiǵa beiimdeýge múmkindik beredi.
