Memleket basshysy Ǵylym jáne joǵary bilim ministri Saiasat Nurbekti qabyldady, dep habarlaidy Dalanews.kz.
Prezidentke vedomstvo qyzmetiniń basym baǵyttary men ǵylym jáne joǵary bilim salalaryndaǵy strategiialyq bastamalardy júzege asyrý barysy baiandaldy.
Qasym-Jomart Toqaevqa jańa Konstitýtsiianyń bilim jáne ǵylym salalaryndaǵy áleýeti jaiynda málimet berildi.
Ministr adam kapitalyn damytatyn ekojúie qurý sharalary men talanttardy úzdiksiz qoldaý tetigin tanystyrdy.
Memleket basshysyna eńbek naryǵyn zertteý nátijeleri men 2030 jylǵa deiingi mamandarǵa suranys boljamy usynyldy. Joǵary bilimniń qoljetimdiligin keńeitý sharalaryna, sonyń ishinde «Keleshek» mehanizmi men salany qarjylandyrýdyń jańa modelin engizýge basa nazar aýdaryldy.
Saiasat Nurbek AI-Sana ulttyq qozǵalysyn ilgeriletý jáne AI-Enabled University indýstriia ýniversitetin iske qosý jaiynda baiandady. Jańa tiptegi bul joba bilim berý men óndiris úderisine jasandy intellektini paidalanady. Budan bólek, innovatsiialyq klasterler men ǵylym qalashyqtary siiaqty ǵylymi-óndiristik aimaqtardy qurý josparymen bólisti.
Ministr DeepTech pen kúrdeli óndiristerdi damytý modeline kóshý júieli túrde qolǵa alynǵanyn jetkizdi. Munda joǵary oqý oryndary men oblys ákimdikteriniń ózara bailanysy airyqsha mánge ie. Bul tehnologiialyq mindetter men keleshegi zor baǵyttardy anyqtaýǵa jol ashady. Atalǵan mehanizm aiasynda ǵylymi-zertteý jáne tájiribelik-konstrýktorlyq jumystar júrgiziledi, ónerkásip úlgileri jasalyp, óndiris iske qosylady.
Ǵylymi saiasatty jetildirýdi kózdeitin reformalar jalǵasyp jatyr. Ministrlik ǵalymdardy memleket tarapynan qoldaýǵa, granttar men syilyqtar berýge, ǵylymi taǵylymdamaǵa jiberýge, sondai-aq jas ǵalymdardy baspanamen qamtýǵa erekshe mán beredi.
Kezdesý sońynda Memleket basshysy joǵary bilim sapasyn arttyrý, ǵylymi zertteýlerdi damytý jáne olardy kommertsiialandyrý, innovatsiialyq qyzmetti yntalandyrý, infraqurylym men sheteldik ýniversitet filialdarynyń jumysyn jetildirý boiynsha birqatar tapsyrma berdi.
