Premer-ministrdiń biýdjet-salyq saiasatyn reformalaýdyń jańa tásilderin ázirleý týraly tapsyrmasyna sáikes vitse-premer - ulttyq ekonomika ministri Serik Jumanǵarin UEM janyndaǵy saraptamalyq keńestiń birinshi otyrysyn ótkizdi, - dep habarlaidy Dalanews.kz.
Keńes otyrysyna qarjy ministri Mádi Takiev, Ulttyq bank tóraǵasynyń orynbasary Aqyljan Baimaǵambetov, ulttyq ekonomika vitse-ministri Azamat Ámrin, 20-dan asa sarapshy, onyń ishinde, iri qarjylyq, investitsiialyq, taldaý jáne konsaltingtik uiymdardyń, Qazaqstan qarjygerler qaýymdastyǵy keńesiniń, "Atameken" UKP basshylary qatysty.
Jiynǵa qatysýshylar biýdjet tabysyn arttyrý sharalaryn, jańa Salyq kodeksin ázirleý sheńberinde usynylǵan jańa sharalar keshenin talqylady.
Qatysýshylardyń kópshiligi kodekstiń jańa redaktsiiasynda usynylyp otyrǵan birqatar qoldanystaǵy salyq jeńildigin alyp tastaý, bankter men qarjy uiymdary úshin korporativtik tabys salyǵynyń (KTS) mólsherlemesin arttyrý, memlekettik baǵaly qaǵazdar boiynsha syiaqylarǵa salyq salýdy engizý merzimderin 2030 jyldan 2026 jylǵa aýystyrý, oiyn biznesine salyq salýdy qaita qaraý jónindegi sharalarmen kelisti. Bul sharalar biýdjetke túsetin kiristi 1 trln teńgeden asa mólsherde arttyrýǵa arnalǵan.
"Alaida bul sharalar shyǵyndar men biýdjet kiristeri arasyndaǵy qalyptasqan alshaqtyqty jabý úshin jetkiliksiz. Keńeste jyl saiyn biýdjetke túsetin salmaq artyp kele jatqany, áleýmettik shyǵyndar ósip jatqany, al ekonomikanyń naqty sektoryn damytý biýdjet shyǵystarynyń 10%-ynan azy ekeni aityldy", - dep jazylǵan habarlamada.
Salyq-biýdjet salalarynda reformalarsyz jaǵdaidy túzeý múmkin emes. Kezdesýge qatysýshylar aqsha-nesie jáne fiskaldyq saiasat arasyndaǵy teńgerimsizdikti teńestirý ári salyq salý júiesiniń tiimdiligin arttyrý boiynsha óz pikirleri men usynystaryn ortaǵa saldy.
"2025 jyl Qazaqstan úshin ońai bolmaidy. Biz ótken jyldardaǵy keiinge qaldyrylǵan, uzaq ýaqytqa sozylǵan reformalardy qabyldaýǵa májbúr bolamyz.
Bul – memleket óziniń áleýmettik mindettemelerin oryndaýdy jalǵastyra alatyndai baǵany naryqtyq jaǵdaiǵa keltirý. Ókinishke qarai, qazir salyqtarǵa qatysty jaǵdaidy túzetý, olardy ákimshilendirýdi jaqsartý, tipti keibir jaǵdailarda mólsherlemelerdi qaita qaraý úshin birqatar tanymal emes reformalardy qabyldaýymyz kerek. Eń bastysy muny Ulttyq qordy saqtaý úshin emes, ekonomikanyń naryqtyq ekonomikaǵa ainalýy úshin jasaýymyz kerek. Jańa Salyq kodeksi, búgin biz talqylaǵan usynystardyń keibiri kóp uzamai kópshiliktiń igiligine ainalady. Men barlyǵyn óz pikirin aitýǵa shaqyramyn", - dedi NAC Analytica KQ (NU) basqarma tóraǵasy Rasýl Rysmambetov.
