2025 jyly elimizde 19 mln sharshy metr nemese 175 myń turǵyn úı, 2029 jylǵa qaraı 111 mln sharshy metr salý josparlanýda. Al 2024 jyly Qazaqstanda 18,96 mln. sharshy metr turǵyn úı salyndy. Bul – Qazaqstan táýelsizdik alǵannan beri turǵyn úı qurylysyndaǵy rekordtyq kórsetkish, dep jazady Dalanews.kz.
Ónerkásip jáne qurylys mınıstrliginiń málimetinshe, 2024 jyldyń qorytyndysy boıynsha elimizde 172 089 baspana paıdalanýǵa berildi. Onyń 39 064-i - jeke úı. Óńirler arasynda Shymkent qalasy, Pavlodar, Túrkistan jáne Qyzylorda oblystary qurylys qarqyny boıynsha kósh bastap tur.
2024 jyl Qazaqstannyń turǵyn úı saıasaty úshin betburys kezeńi boldy. Qarasha aıynda Prezıdent "Turǵyn úı zańnamasyn reformalaý týraly" Zańǵa qol qoıdy. Ol azamattardyń turǵyn úı jaǵdaıyn jaqsartýǵa memlekettik qoldaý kórsetý tetikterin jetildiredi. "Otbasy banki" "Bir tereze" qaǵıdaty boıynsha muqtaj azamattar arasynda turǵyn úıdi tirkeý jáne bólýmen aınalysatyn tolyqqandy damý ınstıtýtyna aınalady. Reforma turǵyn úı alý kezegindegi azamattarǵa baspana berý prosesiniń ashyqtyǵyn arttyrý maqsatynda júrgizildi.
"Sondaı-aq osy zań aıasynda jalǵa beriletin memlekettik turǵyn úılerde turatyn 71 myńǵa jýyq azamatqa páterlerin jekeshelendirýge múmkindik berildi. Jaldamaly turǵyn úı ıeleriniń kópshiligi halyqtyń áleýmettik osal toptary, UOS ardagerleri, múgedektigi bar azamattar, kóp balaly otbasylar, jetim balalar jáne t.b. Áleýmettik osal toptary sanatyndaǵy muqtaj azamattar úshin ákimdikter 20 myńnan astam páter satyp alyndy. Onyń 13 myńǵa jýyq otbasy alǵash ret jeke baspananyń ıesi atandy", delingen mınıstrlik habarlamasynda.
Odan bólek, 2300 azamatqa ıpoteka boıynsha bastapqy jarnany jabý úshin turǵyn úı sertıfıkattary túrinde 2,6 mlrd teńge bólinip, 10,4 myń azamatqa turǵyn úıdi jalǵa alǵany úshin jaldaý aqysynyń bir bóligin jabý úshin turǵyn úı tólemderi sýbsıdıalandy.
"Naýryz" jáne "Otaý" memlekettik baǵdarlamalary aıasynda 2024 jyly 10 myńǵa jýyq otbasy turǵyn úı jaǵdaıyn jaqsartty. 64 myńǵa jýyq otbasyn qoldaýǵa 1 trln teńge bólgen. Memleket jaldaý aqysyn sýbsıdıalaý jáne jeńildetilgen ıpotekalyq nesıeler berý boıynsha qoldaý kórsetýdi jalǵastyrady.
"2025 jyly elimizde 19 mln sharshy metr nemese 175 myń turǵyn úı, 2029 jylǵa qaraı 111 mln sharshy metr salý josparlanýda" dep mınıstrlik tyń derekpen de bólisti.
