Áleýmettik jelilerge monitoring júrgizý barysynda bloger Juldyz Jaýynbaevanyń ákesi tarapynan ózine qatysty zorlyq-zombylyq jasalǵany týraly málimdemeleri, sondai-aq bylapyt sózder aitylǵan jáne qoǵamdyq tártipti buzatyn ózge de áreketter kórsetilgen beinejazbalary anyqtaldy, dep habarlaidy dalanews.kz.
Atalǵan jariia málimdemeler boiynsha tekserý júrgizildi. Kontent avtory jáne onyń ata-anasy anyqtalyp, olardan jaýap alyndy. Quqyqqa qaishy áreketter týraly aqparat rastalmady.
Beinejazbada Almaty qalasynyń turǵyny tyiym salynǵan zattardy qoldanǵanyn kórsetken. Meditsinalyq kýálandyrý esirtki zattaryn qoldaný faktisin rastady.
Sondai-aq blogerdiń áreketterinen usaq buzaqylyq jasaý jáne jalǵan aqparat taratý siiaqty ákimshilik quqyq buzýshylyq belgileri anyqtaldy. Jinalǵan materialdar sotqa joldandy.
Budan bólek, buǵan deiin politsiia qyzmetkerleri azamatshamen profilaktikalyq áńgime júrgizip, quqyqqa qaishy minez-qulyqqa jol bermeý týraly resmi eskertý tapsyrǵan. Sot qaraýynyń nátijesi boiynsha quqyq buzýshyǵa 10 táýlik ákimshilik qamaýǵa alý túrindegi jaza taǵaiyndaldy.
Sondai-aq jalǵan aqparat taratqany jáne resmi eskertýdi buzǵany úshin oǵan 25 AEK mólsherinde aiyppul tóleýge týra keledi.
Aita ketý kerek, buǵan deiin ol arnaiy qyzmetterdi kórineý jalǵan shaqyrǵany jáne usaq buzaqylyq jasaǵany úshin jaýapkershilikke tartylǵan.
Politsiia jalǵan aqparat taratý, qoǵamdyq tártipti buzý, sondai-aq ózge de quqyqqa qaishy áreketter Qazaqstan Respýblikasynyń zańnamasynda kózdelgen jaýapkershilikke ákep soǵatynyn eskertedi.
Azamattardyń yqtimal quqyq buzýshylyqtar týraly barlyq ótinishteri mindetti túrde tekserilip, zańda belgilengen tártippen qaralady.
