Asqar Aqaev 2005 jyldyń naýryzynda Qyrǵyzstannan ketýin qashý dep eseptemeitinin aityp, bul sheshimi arqyly qantógistiń aldyn alýǵa tyrysqanyn málimdedi, dep habarlaidy dalanews.kz.
Exclusive.kg basylymyna bergen kólemdi suhbatynda Qyrǵyzstannyń tuńǵysh prezidenti saiasi elitanyń bir bóliginiń qarsylyǵyna qaramastan, nege somdy engizýdi talap etkenin túsindirdi. Sondai-aq 1990-jyldary "Qumtór" jobasyn iske qosýdyń qajettiligi týraly aityp, balalary men kúieý balasyna qatysty taǵylǵan aiyptarǵa jaýap berdi. Budan bólek, ol "Qumtór" boiynsha naqty ne úshin keshirim suraǵanyn da jetkizdi.
Aqaevtyń sózinshe, prezidenttik qyzmetindegi basty jetistigi – ulttyq valiýtany engizý jáne demokratiianyń qalyptasýy. Al eń úlken qateligi retinde ol Aqsy oqiǵasynyń aldyn der kezinde ala almaǵanyn atady.
Aqaev Qyrǵyzstandy 1990 jyldan 2005 jylǵa deiin basqardy. "Qyzǵaldaq revoliýtsiiasy" kezinde ol elden ketip, keiin resmi túrde otstavkaǵa shyqty.
Qazaqstan úshin onyń esimi tek qyrǵyz saiasatymen ǵana bailanysty emes. 1990-jyldardyń sońynda Aqaevtyń úlken uly Aidar Nursultan Nazarbaevtyń kishi qyzy Áliiaǵa úilengen. Bul neke úsh jylǵa sozyldy.
2005 jylǵy oqiǵalar kezinde dál Nazarbaev Aqaevtyń Bishkekten ketip, Qazaqstan arqyly Reseige ushýyna kómektesken. Osydan keiin Qyrǵyzstannyń burynǵy prezidenti Máskeýge qonystanyp, ǵylymi qyzmetpen ainalysa bastady.
