Qazaqstanda AI-92 benzininiń baǵasy aldaǵy ýaqytta ósýi múmkin. Ekonomist Merýert Mahmutovanyń aitýynsha, buǵan janarmai baǵasyn memlekettik retteýdiń toqtatylýy, kórshi eldermen aradaǵy baǵa aiyrmashylyǵy jáne EAEO aiasynda ortaq munai naryǵynyń qurylýy áser etedi, dep habarlaidy dalanews.kz.
Mahmutova Qazaqstanda óndiriletin benzin ishki naryqtyń suranysyn tolyq óteitinin, alaida janarmai baǵasy Resei men Qyrǵyzstanǵa qaraǵanda áli de tómen ekenin aitty.
“Elimizde benzin ishki naryqty tolyq qamtamasyz etýge jetkilikti kólemde óndiriledi. Biraq janarmai baǵasy sýbsidiialanyp otyrǵandyqtan, Resei men Qyrǵyzstandaǵy baǵadan tómen bolyp otyr”, – dedi sarapshy.
Onyń aitýynsha, 2025 jyldyń sońynda Sankt-Peterbýrgte ótken Eýraziialyq ekonomikalyq keńestiń otyrysynda EAEO elderi 2027 jyldyń 1 qańtarynan bastap munai jáne munai ónimderiniń ortaq naryǵyn qalyptastyrý týraly kelisimge kelgen.
“Bul sheshim Reseidiń munai óńdeý zaýyttary byltyrdan beri ýkrainalyq drondardyń shabýylyna ushyrap jatqan kezeńde qabyldandy”, – dedi Mahmutova.
Sondai-aq sarapshy Qazaqstanda biyl 1 sáýirden bastap benzin baǵasyn ósirýge qoiylǵan moratoriidiń alynyp tastalǵanyn jáne memlekettik baǵa retteýi toqtatylǵanyn eske saldy.
Onyń pikirinshe, Qazaqstandaǵy janarmai baǵasy kórshi elderdegi deńgeige jetkenshe ósýi yqtimal.
“Baǵa Resei men Qyrǵyzstandaǵy deńgeige teńeskenshe ósedi deýge bolady. Bul janarmaidyń Qazaqstannan benzin tasityn kóliktermen de, kanistrmen de syrtqa shyǵarylýyn toqtatýǵa múmkindik beredi. Biraq Reseide janarmai baǵasynyń qashan turaqtaitynyn boljaý qiyn, óitkeni ol jaqta tapshylyq kún saiyn artyp keledi”, – dedi ekonomist.
Merýert Mahmutova ishki naryqtaǵy baǵany ustap turý úshin shekarany jabý máselesin de kóterdi.
“Baǵany ustap turý úshin shekarany jabý qajet bolar edi. Biraq ázirge Qazaqstan mundai sheshim qabyldaýǵa daiyn emes siiaqty”, – dep túiindedi sarapshy.
