Qazaqstannyń qorǵanys ministri Aidos Myrzahmetov áskeri qyzmetin atqarý kezinde qaza tapqan jáne aýyr jaraqat alǵan áskeri qyzmetshilerdiń jaqyndarymen kezdesti. Ministr árbir jaǵdaidy jeke qarap, usynylǵan materialdardy muqiiat zerdeleýge ýáde berdi, dep habarlaidy dalanews.kz.
29 qazanda ótken kezdesýge ár jyldary áskeri boryshyn óteý kezinde qaza tapqan nemese aýyr jaraqat alǵan áskeri qyzmetshilerdiń týystarynan qurylǵan bastamashyl top qatysty.
Azamattardy qabyldaýǵa bas áskeri prokýror men Ishki ister ministrligi Ulttyq ulanynyń ókilderi de shaqyryldy.
Kezdesý barysynda áskeri qyzmetshilerdiń jaqyndary ózderin alańdatqan máselelerdi kóterip, tiisti memlekettik organdarǵa ótinishterin jetkizdi.
Qorǵanys ministri general-maior Aidos Myrzahmetov qaza tapqan sarbazdardyń otbasylaryna qoldaý kórsetý jáne olardyń ótinishterine jaýap berý mańyzdy ekenin atap ótti.
"Qorǵanys ministrligi qaza tapqan jáne zardap shekken áskeri qyzmetshilerdiń otbasynyń qaiǵysyna ortaqtasyp, týystarynyń ótinishterine túsinistikpen qaraidy. Árbir ótinish muqiiat qaralyp, naqty jaýap beriledi", – dedi vedomstvo basshysy.
Ministr áskeri qyzmetshilerge qatysty árbir jaǵdaidyń mán-jaiyn jeke zerdeleýge daiyn ekenin jetkizdi.
Onyń aitýynsha, týystary usynǵan qujattar men ózge de materialdar nazardan tys qalmaidy.
Kezdesý sońynda Aidos Myrzahmetov barlyq ótinishti muqiiat qarap, kóterilgen máseleler boiynsha tiisti jaýap beriletinin málimdedi.
