Sherzat Polattyń ólimine qatysty is boıynsha qorǵanýǵa quqyǵy bar kýá retinde tanylǵan Elmıra Nurbekova advokat Djohar Ýtebekovtiń ústinen shaǵym túsirdi, dep habarlaıdy Dalanews.kz.
Advokat Djohar Ýtebekovtiń aıtýynsha, ol Sherzat Polat isi boıynsha ótkir pikir bildirip júrgeni úshin ústinen shaǵym túsken. Shaǵym Almaty qalalyq advokattar alqasyna joldanǵan.
– Men shaǵymnyń polısıa qyzmetkeriniń nusqaýymen jazylǵanyn ańǵardym. Sebebi mátin polısıa jargony men «óz qolymmen jazyldy» degen sıaqty quqyqtyq termınderge toly. Eń qyzyǵy – Nurbekova hanym polısıany, prokýratýra men sotty qorǵaıdy. Ol meni quqyq qorǵaý organdaryna qysym kórsetip, jalǵan aqparat taratyp jatyr dep esepteıdi. Biraq onyń ne sebepti solardyń advokatyna aınalǵany túsiniksiz. Menińshe, ony bul iske bireýler paıdalanyp otyr. Áıtpese, óz betimen mundaı qadamǵa bara qoıatyn adam emes, – dedi Djohar Ýtebekov «Gıperboreı» YouTube arnasyna bergen suhbatynda.
Elmıra Nurbekova byltyr Talǵardaǵy jappaı tóbeles kezinde qylmystyq iske qatysy bar degen toǵyz adammen birge oqıǵa ornynda bolǵan. Keıinnen kýáger retinde tanylyp, jaýap alynǵan. Ol kezde ózin shok jaǵdaıynda bolǵanyn aıtqan. Alaıda sotta kórsetilgen beınejazbada onyń oqıǵa týraly kúlip aıtyp otyrǵany baıqalǵan. Osyǵan baılanysty prokýror Dana Sársenbaı sottan Elmıra Nurbekova men taǵy bir kýáger Dana Jaqsygeldige qatysty jeke qaýly shyǵaryp, qosymsha tergeý júrgizýdi suraǵan.
5 maýsym kúni úkim oqyǵan sot prokýrordyń bul ótinishin qanaǵattandyrdy. İs boıynsha basty aıyptalýshy Abzal Shynasyl 23 jylǵa, Ravıl Sákıev 20 jylǵa, Azamat Toqtaýbaev 15 jylǵa, Nurqıas İlıasov 9 jylǵa bas bostandyǵynan aıyryldy. Al qalǵan aıyptalýshylar – Shyńǵys Belǵojaev, Darhan Áskentaı, Nurbol Toqtaýbaev jáne Dıdar Qalıahmet 7 jylǵa sottaldy. Kámeletke tolmaǵan Dýman Ysqaqqa 1,5 jyl jaza kesildi.
