شەرزات پولاتتىڭ ولىمىنە قاتىستى ءىس بويىنشا قورعانۋعا قۇقىعى بار كۋا رەتىندە تانىلعان ەلميرا نۇربەكوۆا ادۆوكات دجوحار ۋتەبەكوۆتىڭ ۇستىنەن شاعىم ءتۇسىردى، دەپ حابارلايدى Dalanews.kz.
ادۆوكات دجوحار ۋتەبەكوۆتىڭ ايتۋىنشا، ول شەرزات پولات ءىسى بويىنشا وتكىر پىكىر ءبىلدىرىپ جۇرگەنى ءۇشىن ۇستىنەن شاعىم تۇسكەن. شاعىم الماتى قالالىق ادۆوكاتتار القاسىنا جولدانعان.
– مەن شاعىمنىڭ پوليسيا قىزمەتكەرىنىڭ نۇسقاۋىمەن جازىلعانىن اڭعاردىم. سەبەبى ءماتىن پوليسيا جارگونى مەن «ءوز قولىممەن جازىلدى» دەگەن سياقتى قۇقىقتىق تەرميندەرگە تولى. ەڭ قىزىعى – نۇربەكوۆا حانىم پوليسيانى، پروكۋراتۋرا مەن سوتتى قورعايدى. ول مەنى قۇقىق قورعاۋ ورگاندارىنا قىسىم كورسەتىپ، جالعان اقپارات تاراتىپ جاتىر دەپ ەسەپتەيدى. ءبىراق ونىڭ نە سەبەپتى سولاردىڭ ادۆوكاتىنا اينالعانى تۇسىنىكسىز. مەنىڭشە، ونى بۇل ىسكە بىرەۋلەر پايدالانىپ وتىر. ايتپەسە، ءوز بەتىمەن مۇنداي قادامعا بارا قوياتىن ادام ەمەس، – دەدى دجوحار ۋتەبەكوۆ «گيپەربورەي» YouTube ارناسىنا بەرگەن سۇحباتىندا.
ەلميرا نۇربەكوۆا بىلتىر تالعارداعى جاپپاي توبەلەس كەزىندە قىلمىستىق ىسكە قاتىسى بار دەگەن توعىز اداممەن بىرگە وقيعا ورنىندا بولعان. كەيىننەن كۋاگەر رەتىندە تانىلىپ، جاۋاپ الىنعان. ول كەزدە ءوزىن شوك جاعدايىندا بولعانىن ايتقان. الايدا سوتتا كورسەتىلگەن بەينەجازبادا ونىڭ وقيعا تۋرالى كۇلىپ ايتىپ وتىرعانى بايقالعان. وسىعان بايلانىستى پروكۋرور دانا سارسەنباي سوتتان ەلميرا نۇربەكوۆا مەن تاعى ءبىر كۋاگەر دانا جاقسىگەلدىگە قاتىستى جەكە قاۋلى شىعارىپ، قوسىمشا تەرگەۋ جۇرگىزۋدى سۇراعان.
5 ماۋسىم كۇنى ۇكىم وقىعان سوت پروكۋروردىڭ بۇل ءوتىنىشىن قاناعاتتاندىردى. ءىس بويىنشا باستى ايىپتالۋشى ابزال شىناسىل 23 جىلعا، راۆيل ساكييەۆ 20 جىلعا، ازامات توقتاۋبايەۆ 15 جىلعا، نۇرقياس ءىلياسوۆ 9 جىلعا باس بوستاندىعىنان ايىرىلدى. ال قالعان ايىپتالۋشىلار – شىڭعىس بەلعوجايەۆ، دارحان اسكەنتاي، نۇربول توقتاۋبايەۆ جانە ديدار قالياحمەت 7 جىلعا سوتتالدى. كامەلەتكە تولماعان دۋمان ىسقاققا 1،5 جىل جازا كەسىلدى.
