Belgili zańger Aıgúl Orynbek elimizde jappaı ashylyp jatqan qaıyrymdylyq qorlary jaıly sóz qozǵady. Aıtýynsha, olardyń basym bóligi halyqty óz múddelerine paıdalanýdy kózdeıdi, dep habarlaıdy Dalanews.kz.
“Qandy qańtar oqıǵasynan keıin el aldynda júrgen qor ashqyshtardy tekserýdi suraǵan edim. Bálkim, olar “qaırymdylyq úshin” dep, qorǵa jınalǵan aqshaǵa terrorısterdi qarjylandyryp otyrǵan shyǵar. Qorlardyń kóbeıip ketkeni sonsha, muny kásip kózine aınaldyryp alǵandar da bar. Ańqaý ári ańǵal halyq pıramıdaǵa aldaǵandary azdaı, endi qorlarǵa jem bolyp jatyr. Jalpy halyqtyń ózine daýa joq”, - deıdi ol.
Zańger halyqty senimdi qaıyrymdylyq qorlaryna júginýge shaqyrdy.
“Prezıdentimiz Qasym-Jomart Kemeluly “Qazaq halqyna” qoryn ashty. Eger memleketke janyńyz ashyp, qaırymdylyq jasaǵyńyz kelse, árbir tıyny baqylaýda turǵan qorǵa salý oryndy. Ókinishke qaraı, Prezıdentimizdiń tapsyrmasyn oryndamaı, sabotaj jasaǵyshtar qorlardy kóbeıtip jiberdi. Tipti, ákimdik ishinen qor ashyp alǵan ákimder de bar. Bulardyń bárin elimizdiń Ulttyq qaýipsizdik komıteti tekserýi kerek”, - dedi ol.
Osylaı dep dabyl qaqqan zańger QR Bas prokýratýrasy men QR Ulttyq qaýipsizdik komıtetinen jaǵdaıdy qatań baqylaýǵa alýyn surady.
“Kóshede múgedek balanyń sýretin ustap, alaqan jaıǵan jasóspirimderdiń áreketine toqtaý salý qajet. Perızattyń Palestınaǵa kómek berip júrgenin kórip, osy qyz alaıaqtyǵy bar jat aǵymdaǵy aǵalarynyń qolyna túsip qalǵan joq pa eken degen oıda qalǵan edim. Sońǵy shyqqan aqparat bizdiń eldegi qorlardy qatań baqylaýǵa alyp, qorlarǵa qatysty tıisti zań shyǵarý kerek ekenin aıqyn kórsetip berdi. Shet elden qarjylandyrylatyn qorlardy da tekserýdi suraımyn”, - dep qosty ol.
Eske salaıyq, kúni keshe QMA eriktiler qozǵalysynyń belsendisi jáne BizBirgemizQazaqstan qoǵamdyq qaıyrymdylyq qorynyń quryltaıshysy Perızat Qaıratqa qatysty tergeý júrgizilip jatqany belgili bolǵan edi.
Ol kóktemgi sý tasqynynan zardap shekken azamattarǵa kómektesý úshin jınalǵan 1,5 mlrd teńgeden astam qarajatty jymqyrdy dep kúdikke ilindi.
Qaıyrymdylyqtyń negizgi bóligi qymbat sán buıymdary men jyljymaıtyn múlikti satyp alý maqsatyna paıdalanyldy.
Bıyl kóktemde ol elordadaǵy avtosalondarda 88 mln teńgege "Mercedes-Benz S450", 80 mln teńgege "Lexus LX-600" jáne 39 mln teńgege "Haval" avtokólikterin satyp aldy.
Osy kezeńde ol jalpy somasy 600 mln teńgeni quraıtyn elordanyń premıým sanattaǵy "Akbulak Riviera", "Highvill Ishim Gold", "Kók Jaılaý" TK (turaq oryndaryn qosa alǵanda), sondaı-aq "Vela Village" kotej qalashyǵynda jyljymaıtyn múlik nysandaryn satyp aldy.
Sonymen qatar, qazaqstandyqtardyń qaıyrymdylyqqa jibergen qarajat esebinen Perızat Q. Dýbaı, Doha, London jáne Stambýldaǵy «St. Regis», «Shangri-La», «Palazzo Versace» jáne «Kempinski» sıaqty bes juldyzdy qonaq úılerde demalǵan.
Bul elderde ol "Cartier" jáne "Louis Vuitton" sıaqty brendterdiń qymbat aksesýarlary men zergerlik buıymdardy satyp alyp, feshenebeldi meıramhanalarǵa baryp, ıahtalardy jaldaǵan.
Qylmystyq shemany júzege asyrý úshin dostary men týystaryna 8% syıaqy berip, qordyń aqshasy qolma-qol aqshaǵa aınaldyryp otyrǵan.
Osylaısha, Perızat Q. óziniń zańsyz áreketterimen eriktiler qozǵalysynyń bedeline nuqsan keltirip, onyń ashyqtyq pen adaldyq prınsıpterine kúmán keltirdi jáne halyqtyń senip tapsyrǵan qarajatyn talan-tarajǵa salǵan.
