Prezident Qasym-Jomart Toqaev jylytý maýsymyna bailanysty ákimderge eskertý jasady, - dep habarlaidy Dalanews.kz.
Toqaev jylytý maýsymyn minsiz ótkizý – ózekti máselelerdiń biri ekenin atap ótti.
"Bul meniń erekshe baqylaýymda. Saran qalasy aýa-raiynyń sýytýyna daiyn bolmai shyqty. Mundaǵy úiler jaqynda ǵana jylý júiesine qosylǵan edi. Kemshilikke jol bergen jaýapty tulǵalar tiisti jazasyn aldy. Bul barlyq ákimge sabaq bolýy kerek. Jylytý maýsymyna daiyn bolmaý basshylardyń óz qyzmetine sai kelmeitinin kórsetedi. Degenmen biyl el aýmaǵynda energiia kózderi men jylýmen jabdyqtaý jelilerin jóndeý boiynsha aýqymdy jumys júrgizildi. Qoimalardaǵy otyn qory jetkilikti. Biraq qamsyz otyrýǵa bolmaidy. Jaǵdaidy udaiy baqylaýda ustaý kerek", - deidi prezident.
Toqaev memlekettik basqarý júiesiniń aldynda qazir naqty mindetter men edáýir syn-qater turǵanyn aitty.
"Oqys oqiǵalarǵa der kezinde ún qatý, jaǵdaidy ýshyqtyrmaý, dál boljam jasaý, qoǵamnyń talap-tilegine qulaq asý mańyzdy. Barlyq memlekettik organ, kommýnaldyq jáne basqa da qyzmetter úilesimdi áreket etýi kerek. Alaida, kúndelikti sharýamen ainalysyp júrip, strategiialyq maqsattardy umyt qaldyrmaý qajet. Alǵa qarai umtylyp, keń aýqymdy perspektivany baǵyt etkenimiz jón. Problemanyń ýaqytsha sheshimin izdemei, onyń túpki sebepterin joiýymyz qajet.
Joldaýda biýdjet qarjysyn tiimdi paidalanýǵa baǵyttalǵan sharalar qabyldaýdy tapsyrǵanymdy bilesizder. Álbette, biýdjet saiasatynda pragmatizm qaǵidaty basty orynda bolýy kerek. Biraq áleýmettik shyǵyndardan, biýdjettik mekeme qyzmetkerleriniń jalaqysynan, zeinetaqy men járdemaqydan únemdeýge bolmaidy. Bul – meniń berik ustanymym. Azamattardyń ál-aýqatyn arttyrý jónindegi basym mindetti udaiy nazarda ustaǵan durys. Zeinetaqy júiesiniń áleýetin arttyrýdyń, ony jetildirýdiń tásilderin tabý kerek. Deni saý, qajyr-qairaty mol zeinetkerlerdiń el damýyna qosyp júrgen úlesin yntalandyrý mańyzdy. Ortasha ómir súrý jasyn birtindep ulǵaitý – memlekettiń áleýmettik saiasatynyń basty jetistikteriniń biri. Bul kórsetkish qazirdiń ózinde 75 jastan asty. Osy turǵydan alǵanda atalǵan másele ózekti bola túsedi", - deidi prezident.
