Perizat Qairat para ústel tennisi federatsiiasynyń prezidenti qyzmetinen bosatyldy, - dep habarlaidy Dalanews.kz.
Uiym ony kúni keshe ustalǵany týraly aqparat shyqqannan keiin jumystan qýypty. Bul týraly federatsiia ókilderi Tengrinews.kz tilshilerine habarlaǵan.
Para ústel tennisi federatsiiasyndaǵylardyń sózinshe, Perizat Qairat bul qyzmetke ózin ózi usynǵan. Alaida federatsiia ókilderiniń sózinshe, onyń bul qyzmetke kelýinen paida bolmapty.
"Ol taǵaiyndalǵanǵa deiin federatsiiaǵa qatysy bolmady. Biraq sportqa jáne federatsiiaǵa qarjylai kómektesý úshin ózin usyndy. Onyń bul qyzmetke taǵaiyndalǵanyna bir aidai ǵana bolǵan. Biraq osy ýaqyt aralyǵynda birde-bir jumys otyrysyn nemese jumys kezdesýin uiymdastyrǵan emes", - delingen habarlamada.
Eske salaiyq, kúni keshe Qarjylyq monitoring agenttigi eriktiler qozǵalysynyń belsendisi jáne qoǵamdyq qaiyrymdylyq qorynyń quryltaishysy Perizat Qairatqa qatysty tergeý júrgizilip jatqanyn habarlaǵan bolatyn.
Ol kóktemgi sý tasqynynan zardap shekken azamattarǵa kómektesý úshin jinalǵan 1,5 mlrd teńgeden astam qarajatty jymqyrdy dep kúdiktelýde.
Qaiyrymdylyqtyń negizgi bóligi qymbat sán buiymdary men jyljymaityn múlikti satyp alý maqsatyna paidalanyldy.
Biyl kóktemde ol elordadaǵy avtosalondarda 88 mln teńgege "Mercedes-Benz S450", 80 mln teńgege "Lexus LX-600" jáne 39 mln teńgege "Haval" avtokólikterin satyp aldy.
Osy kezeńde ol jalpy somasy 600 mln teńgeni quraityn elordanyń premiým sanattaǵy "Akbulak Riviera", "Highvill Ishim Gold", "Kók Jailaý" TK (turaq oryndaryn qosa alǵanda), sondai-aq "Vela Village" kottedj qalashyǵynda jyljymaityn múlik nysandaryn satyp aldy.
Sonymen qatar, qazaqstandyqtardyń qaiyrymdylyqqa jibergen qarajat esebinen Perizat Q. Dýbai, Doha, London jáne Stambýldaǵy «St. Regis», «Shangri-La», «Palazzo Versace» jáne «Kempinski» siiaqty bes juldyzdy qonaq úilerde demalǵan.
Bul elderde ol "Cartier" jáne "Louis Vuitton" siiaqty brendterdiń qymbat aksessýarlary men zergerlik buiymdardy satyp alyp, feshenebeldi meiramhanalarǵa baryp, iahtalardy jaldaǵan.
Qylmystyq shemany júzege asyrý úshin dostary men týystaryna 8% syiaqy berip, qordyń aqshasy qolma-qol aqshaǵa ainaldyryp otyrǵan.
Osylaisha, Perizat Q. óziniń zańsyz áreketterimen eriktiler qozǵalysynyń bedeline nuqsan keltirip, onyń ashyqtyq pen adaldyq printsipterine kúmán keltirdi jáne halyqtyń senip tapsyrǵan qarajatyn talan-tarajǵa salǵan.
Kúdikti ustaldy.
Aita ketsek,32 jastaǵy aqtóbelik Perizat Qairatqyzy shetelde (Ulybritaniia) oqyp, jumys ta istegen bilimdi jastardyń biri. Elge kelgen soń saiasatqa tartylyp, sońǵy kezderi úkimettik emes uiymdarda jumys istep júr. Keibir saiasattanýshy ol basqaratyn BizBirgemiz Qazaqstan qaiyrymdylyq qory úkimettik emesten góri, bilikke jaqynyraq uiym ekenin aitady.
Sý tasqyny kezinde Perizat belsendi jumystar atqaryp, el kózine jii túsken. Tabiǵi apat oryndarynda bolǵan volonter jelide syni jazba da jazǵan. Biyl kóktemde onyń qaiyrymdylyq aiasynda Gaza sektoryna da barǵany týraly aqparat bar.
