Ózbekstan Olii Májilisiniń zań shyǵarý palatasy 14 jasqa tolmaǵan balalardy zorlaǵandarǵa qatysty jazany kúsheitýdi kózdeitin zań jobasyn birinshi oqylymda maquldady, dep habarlaidy dalanews.kz.
Jobaǵa sáikes, mundai aýyr qylmys jasaǵandardy ómir boiyna bas bostandyǵynan aiyrý múmkindigi qarastyrylǵan. Sonymen qatar balalarǵa qarsy jasalǵan aýyr qylmystar boiynsha kinálilerdi qylmystyń eskirý merzimine bailanysty jaýapkershilikten bosatpaý usynylyp otyr.
Qujatta jábirlenýshiden jaýap alý protsesin mindetti túrde beinetaspaǵa jazý jáne olarǵa memleket esebinen zańgerlik kómek kórsetý tetikteri de qamtylǵan.
Budan bólek, bala tárbiesine qatysty mindetterdi oryndamaý, balalardyń quqyqtaryna qol suǵý, neke jasyna bailanysty zań talaptaryn buzý, sondai-aq muǵalimderdiń bilim berý barysynda balaǵa kúsh qoldanýy úshin jaýapkershilikti kúsheitý kózdelgen.
Balalarǵa qarsy aýyr qylmystar úshin jazany qataitý máselesi Namanǵan oblysyndaǵy memlekettik balabaqshada bolǵan oqiǵadan keiin kún tártibine shyqty. Onda 5 jastaǵy qyz bala zorlandy degen kúdikpen balabaqshanyń sharýashylyq jumystaryna jaýapty 52 jastaǵy qyzmetker ustalyp, qamaýǵa alynǵan.
