Kaspii teńizinde bolǵan qaiǵyly oqiǵadan aman qalǵan atyraýlyq sarbaz Beket Qýandyqqa «Erligi úshin» memlekettik medali tabystaldy. Marapatty jaýyngerge Atyraý oblysynyń ákimi Bolat Aqsholaqov saltanatty túrde tapsyrdy, dep habarlaidy dalanews.kz.
Beket Qýandyq Memleket basshysynyń Jarlyǵymen memlekettik nagradaǵa ie bolǵan.
Buǵan deiin jas sarbaz Kaspii teńizinde bolǵan qaiǵyly tótenshe jaǵdai kezinde aman qalǵan edi. Atalǵan oqiǵada onyń qarýlastary qaza tapqan. Prezident sarbazdyń qiyn sátte kórsetken qaisarlyǵy men tabandylyǵyn joǵary baǵalap, «Erligi úshin» medalimen marapattaý týraly sheshim qabyldaǵan.
Memlekettik nagradany tabystaý rásimine Atyraý oblysynyń ákimi Bolat Aqsholaqov qatysyp, jaýyngerge medaldi resmi túrde tapsyrdy.
Saltanatty sharadan keiin Beket Qýandyq áleýmettik jelidegi paraqshasynda marapattaý rásiminen túsirilgen fotosýretterdi jariialady. Jas sarbaz óz jazbasynda Kaspii teńizindegi qaiǵyly oqiǵany eske alyp, sol kúni ómirden ótken qarýlastaryna qurmet bildirgen.
«Teńizden aman oralǵan kún — ómirimdegi eń umytylmas sátterdiń biri. Bul marapat — únsiz qalǵan erliktiń belgisi. Jatqan jerleri jaryq bolsyn, qarýlastarym!» – dep jazdy Beket Qýandyq.
Osylaisha, sarbaz memlekettik marapat alǵan sátinde qaza tapqan qyzmettes joldastaryn umytpaǵanyn jetkizdi.
Aita keteiik, «Erligi úshin» medali – Qazaqstan Respýblikasynyń memlekettik nagradalarynyń biri. Ol azamattarǵa batyldyq pen janqiiarlyq tanytqany úshin beriledi.
