Soltústik Qazaqstan oblysynda tabiǵi resýrstar jáne tabiǵat paidalanýdy retteý basqarmasynyń burynǵy basshysy Erbolat Bekshenov pen alty orman sharýashylyǵynyń direktory sybailas jemqorlyqqa qatysty is boiynsha sot aldynda jaýap berip jatyr, dep habarlaidy dalanews.kz "Kazinform"-ǵa silteme jasap.
Bekshenovke qyzmettik ókilettigin paidalanyp alaiaqtyq jasady jáne para berýge itermeledi degen aiyp taǵylǵan. Al orman sharýashylyqtarynyń biriniń direktoryna para berýge kómektesti degen kúdik keltirilse, qalǵandary para berýge oqtaldy dep aiyptalyp otyr.
Is materialdaryna sáikes, oqiǵa 2025 jyly mamandandyrylǵan tabiǵat qorǵaý prokýratýrasy júrgizgen tekseristen keiin bastalǵan. Sol kezde óńirdegi bes orman sharýashylyǵynda eńbek zańnamasynyń buzylǵany anyqtalǵan. Atap aitqanda, keibir qyzmetkerlerge jumysqa kelmegen kúnderi úshin jalaqy eseptelgen. Zańsyz tólengen qarajat biýdjetke qaitarylyp, 19 laýazymdy tulǵa tártiptik jaýapkershilikke tartylǵan.
Tergeý nusqasy boiynsha, osydan keiin sol kezdegi basqarma basshysy Erbolat Bekshenov orman sharýashylyqtarynyń direktorlaryna másele qaita qaralyp, qyzmetterinen aiyrylýy múmkin ekenin aityp, árqaisysynan 100 myń teńgeden jinaýdy uiymdastyrǵan. Jinalǵan aqshany bir direktordyń basqa basshylardan alyp, oǵan jetkizýi tiis bolǵan.
Tórt direktor aqshany 1 naýryzda bergen. Taǵy bireýi Bekshenovpen sóileskennen keiin qarajat tapsyrǵan. Alaida keiin basqarma basshysynyń orynbasary UQK-niń Soltústik Qazaqstan oblysy boiynsha departamentine júginip, jinalǵan 500 myń teńgeni óz erkimen tapsyrǵan.
Sot otyrysynda Bekshenov pen bes orman sharýashylyǵynyń basshysy kinásin moiyndaǵan. Keibir sottalýshylar prokýrormen protsestik kelisim jasasýǵa nietti ekenin jetkizgen. Al taǵy bir direktor taǵylǵan aiypty moiyndamai, qorǵaýshylary onyń basshylyq tarapynan qysym kórgenin alǵa tartqan. Advokattar oǵan qatysty qylmystyq qýdalaýdy toqtatýdy surady.
Qazirgi ýaqytta sot protsesi jalǵasyp jatyr.
