Astana qalasy ákimdiginiń №2 balalar kitaphanasynda «Taza Qazaqstan – ekologiialyq mádeniet» atty ekologiialyq-aǵartýshylyq viktorina ótti. Is-shara 2024-2029 jyldarǵa arnalǵan ekologiialyq mádenietti damytýdyń respýblikalyq tujyrymdamasyn iske asyrý aiasynda uiymdastyrylyp, qorshaǵan ortany qorǵaý máselelerine qyzyǵýshylyq tanytqan elordalyq oqýshylardyń basyn qosty, dep habarlaidy dalanews.kz.
Kezdesýdiń negizgi maqsaty – óskeleń urpaq arasynda ekologiialyq mádenietti qalyptastyrý. Uiymdastyrýshylar balalardyń bilimin tekserip qana qoimai, kitap arqyly tabiǵatqa qurmetpen qaraýǵa tárbieleýdi jáne kitaphananyń ekologiialyq aǵartýdaǵy mańyzdy rólin kórsetýdi kózdedi.
Baǵdarlamanyń negizgi bóligi interaktivti viktorina boldy. Oqýshylar tabiǵatty qorǵaý, turmystyq qaldyqtardy durys suryptaý jáne tabiǵi resýrstardy utymdy paidalaný taqyryptaryndaǵy suraqtarǵa belsendi jaýap berdi. Qatysýshylar qorshaǵan ortany qorǵaý máselelerindegi bilimderi men jaýapkershiligin kórsetti.
Olardyń nazaryna kitaphana qyzmetkerleri daiyndaǵan taqyryptyq kitap kórmesi de usynyldy. Kórmege kórkem, ǵylymi-kópshilik jáne tanymdyq ádebietter qoiyldy. Kitaphanashylar oqýshylarǵa usynylǵan basylymdarǵa sholý jasap, ekologiia taqyrybyndaǵy mazmundy ári qyzyqty kitaptarmen tanystyrdy.
Is-shara ekologiialyq bilimdi nasihattaýǵa jáne jastar arasynda kitap oqý mádenietin damytýǵa baǵyttalǵan mańyzdy qadam boldy. Sonymen qatar kitaphananyń jaýapty urpaq tárbieleýge yqpal etetin mańyzdy alańdardyń biri ekenin kórsetti.
