Mańǵystaý oblysynda áskeri qyzmetshilerdiń qaza bolýyna bailanysty oqiǵa qoǵamda úlken rezonans týǵyzdy. Qaiǵyly jaǵdaidan keiin áleýmettik jeliler men aqparattyq keńistikte túrli boljamdar, rastalmaǵan málimetter men arandatýshylyq sipattaǵy materialdar tarai bastady. Saiasattanýshy Daniiar Áshimbaevtyń pikirinshe, mundai jaǵdaida biliktiń jedel ári úilesimdi áreket etýi mańyzdy boldy, dep habarlaidy dalanews.kz.
Sarapshynyń aitýynsha, memleket oqiǵaǵa qatysty birneshe baǵytta qatar jumys júrgizdi. Atap aitqanda, aqparattyq túsindirý jumystary uiymdastyrylyp, tergeý bastaldy jáne áleýmettik-saiasi sipattaǵy sharalar qolǵa alyndy.
«Alǵashqy emotsiialyq tolqynnan keiin aqparattyq jumystyń naqty algoritmi qalyptasty. Jalǵan aqparatty anyqtaý men joqqa shyǵarý, jaǵdaidy turaqty baqylaý jáne qoǵamǵa resmi málimet berý tetikteri iske qosyldy», – deidi Áshimbaev.
Onyń pikirinshe, zardap shekken otbasylarǵa kómek kórsetý jumystary da júieli uiymdastyrylǵan. Qaiyrymdylyq pen qoldaý sharalary artyq jariialylyqsyz júrgizilgen.
Saiasattanýshy Memleket basshysy Qasym-Jomart Toqaevtyń ustanymyna da toqtaldy. Onyń aitýynsha, Prezident tek kóńil aityp, kinálilerdi jazalaýdy talap etýmen shektelmei, memlekettiń jaýapkershiligin naqty atap kórsetip, qorǵanys salasyn reformalaý qajettigin kóterdi.
«Prezident máseleniń sebepterine nazar aýdaryp, mundai jaǵdailardyń qaitalanbaýy úshin qandai qadamdar qajet ekenin kórsetti. Sonymen birge armiiany jańǵyrtýǵa baǵyttalǵan naqty reformalar ázirlenetinin málimdedi», – dedi sarapshy.
Áshimbaev qoǵamnyń da bul ustanymdy túsinistikpen qabyldaǵanyn aitady. Onyń sózinshe, azamattar biliktiń tek oqiǵanyń saldaryn joiýmen emes, júieli qorytyndy jasap, túitkilderdiń túpki sebepterin sheshýge nietti ekenin kórdi.
Sarapshynyń pikirinshe, qazirgi jaǵdaida qoǵam úshin eń mańyzdysy – ádil tergeý júrgizilip, jaýapty tulǵalardyń áreketine baǵa berilýimen qatar, áskeri qyzmettiń qaýipsizdigin arttyrýǵa baǵyttalǵan naqty ózgeristerdiń júzege asýy.
