Tanymal jýrnalist Dinara Sátjan keshe ǵana ustalǵan Perizat Qairatqa qatysty jaǵdai sabaq bolýy kerek ekenin, elde resmi organdar usynǵan qaiyrymdylyq qorlardyń tizimi bolýy qajet ekenin aitty. Ol Perizat Qairatpen arada qandai oqiǵa bolǵanyn da baiandap berdi,- dep habarlaidy Dalanews.kz.
Dinara Sátjannyń aitýynsha, osydan 3 jyl buryn ózinen Perizat Qairat Astanada qaiyrymdylyq keshin ótkizýin, bul keshte onyń shoýrýmynan bir obrazdy aýktsionǵa qoiýyn, Baian, Aida sekildi qurbylaryn shaqyrýyn ótingen. Al keshtiń basty maqsaty elordada erekshe balalarǵa arnalǵan ońaltý ortalyǵynyń qurylysyna qarajat jinaý bolǵan.
"Biz kelistik. Ol keshte sol kezdegi "Nur Otan" partiiasynyń resmi ókilderi de boldy. Kópshilik "Biz birgemiz" qorynyń partiiamen bailanysy bar dep oilaǵan shyǵar, biraq olai emes", - deidi jýrnalist.
Dinara Sátjan Perizat Qairatpen kezdesken saiyn ońaltý ortalyǵynyń qurylysy týraly suraǵanyn, buǵan "máseleni sheship jatyrmyz" degen jaýap alǵanyn aitady.
"Biyl Orazada aýyzasharda taǵy kezdestik. Perizat Astanadaǵy eki tanymal gúl biznesin satyp alǵanyn aitty. Eki brendtiń negizin qalaýshylardy tanimyn. Olar - biznesti nólden bastap, óz eńbekterimen jetistikke jetken jandar. Sol kezde ázildep: "Perizat, munai ken ornyn taýyp aldyń ba?" dep suradym", - deidi Dinara Sátjan.
Jýrnalist qazir elde oligarhtardyń ózinen zańsyz aktivter qaitarylyp jatqanda, Qarjylyq monitoring agenttiginiń nazarynan eshteńe tys qalmaitynyn, onyń ústine áńgime 1,5 mlrd teńge týraly bolǵanda, agenttikten eshteńeni jasyrý múmkin emes ekenin aitady.
"Perizattyń kómek kórsetkenin bárimiz kórdik. Sý tasqyny kezinde de, Gaza sektoryna barǵanda da. Munyń bári - shyndyq. Adamdardyń qinalǵanyn kórgende, árine, kómekteskiń keledi. Bul - qalypty jaǵdai. Qazir sol kezde onyń qory arqyly kómek jibergender qapaly shyǵar.
Bul oqiǵadan keiin qaiyrymdylyq qorlarynyń esebi ashyq júrgizilýi kerek dep oilaimyn. Senimdi qorlardyń tizimi bolǵany da durys. Saitqa kirip, QMA nemese basqa vedomstvo usynǵan qorlardy kórip, soǵan aqsha aýdarsań bolady. Óitkeni bizdiń qanymyzda kisige jaqsylyq jasaý, qaiyrymdylyq kórsetý burynnan bar! Al qaiyrymdylyq ekonomikasy ashyq ári ádil bolýy kerek", - deidi jýrnalist.
Aita keteiik, QMA eriktiler qozǵalysynyń belsendisi jáne qoǵamdyq qaiyrymdylyq qorynyń quryltaishysy Perizat Qairatqa qatysty tergeý júrgizip jatyr.
"Ol kóktemgi sý tasqynynan zardap shekken azamattarǵa kómektesý úshin jinalǵan 1,5 mlrd teńgeden astam qarajatty jymqyrdy degen kúdikke ilindi", - dep habarlady agenttik buǵan deiin.
Málimetke súiensek, qaiyrymdylyqtyń negizgi bóligi qymbat sán buiymdary men jyljymaityn múlikti satyp alý maqsatyna jumsalǵan.
"Biyl kóktemde ol elordadaǵy avtosalondarda 88 mln teńgege "Mercedes-Benz S450", 80 mln teńgege "Lexus LX-600" jáne 39 mln teńgege "Haval" avtokólikterin satyp aldy. Osy kezeńde ol jalpy somasy 600 mln teńgeni quraityn elordanyń premiým sanattaǵy "Akbulak Riviera", "Highvill Ishim Gold", "Kók Jailaý" TK (turaq oryndaryn qosa alǵanda), sondai-aq "Vela Village" kottedj qalashyǵynda jyljymaityn múlik nysandaryn satyp aldy.
Sonymen qatar, qazaqstandyqtardyń qaiyrymdylyqqa jibergen qarajat esebinen Perizat Q. Dýbai, Doha, London jáne Stambýldaǵy «St. Regis», «Shangri-La», «Palazzo Versace» jáne «Kempinski» siiaqty bes juldyzdy qonaq úilerde demalǵan. Bul elderde ol "Cartier" jáne "Louis Vuitton" siiaqty brendterdiń qymbat aksessýarlary men zergerlik buiymdardy satyp alyp, feshenebeldi meiramhanalarǵa baryp, iahtalardy jaldaǵan. Qylmystyq shemany júzege asyrý úshin dostary men týystaryna 8% syiaqy berip, qordyń aqshasy qolma-qol aqshaǵa ainaldyryp otyrǵan.
Osylaisha, Perizat Q. óziniń zańsyz áreketterimen eriktiler qozǵalysynyń bedeline nuqsan keltirip, onyń ashyqtyq pen adaldyq printsipterine kúmán keltirdi jáne halyqtyń senip tapsyrǵan qarajatyn talan-tarajǵa salǵan", - dep jazylǵan agenttik málimetinde.
