Dini bostandyqtarǵa járdemdesýdi óziniń maqsaty dep sanaityn norvegiialyq Forum 18 uiymy qazaqstandyq shoýmen Nurtas Adambaidyń isine nazar aýdardy, - dep habarlaidy Dalanews.kz.
Adambai áleýmettik jelide Qurannan úzindi keltirgeni úshin aiyptalǵan bolatyn.
Forum 18 málimetinshe, Shoýmenniń isin Astana qalasynyń mamandandyrylǵan aýdanaralyq ákimshilik soty qaraýy kerek. Nurtas Adambaiǵa qatysty tergeý júrip jatqany týraly aqparat 1 tamyzda taraǵanymen sot tyńdaýlary áli bastalǵan joq.
Forum 18 Astana Din isteri basqarmasynyń basshysy Qairolla Kúshqaliev Adambaidyń Qurannan úzindi keltirgeni úshin nelikten jazalanýy keregin túsindire almady dep sanaidy. Din isteri komitetiniń tóraǵasy Erjan Nókejanov pen onyń orynbasary jýrnalisterge jaýap bermedi.
"Astana Din isteri basqarmasynyń qyzmetkerleri Adambaiǵa qatysty isti daiyndaǵan bas maman Ásel Daniiarovanyń qazir eńbek demalysynda ekenin habarlady. Biz departament basshysy Qairolla Kúshqalievpen 14 qarashada habarlasqan edik, biraq ol Forum 18 saitynyń Adambaidy internette Qurannan úzindi keltirgeni úshin nege jazalamaqshy degen saýalyna jaýap bermedi", - dep jazdy norvegiialyq uiym.
Buǵan deiin musylmandar quqyn qorǵaityn jahandyq uiym Nurtas Adambaiǵa arasha túsken bolatyn.
Amerikadaǵy musylmandar quqyǵyn qorǵaýmen ainalysatyn eń iri uiym — Amerika-Islam qatynastary keńesi (CAIR) Qurannan aiat keltirgeni úshin akter Nurtas Adambaiǵa aiyppul salǵan Qazaqstan úkimetin qatań synǵa aldy.
Buǵan deiin Qazaqstan úkimeti óner iesine dini qyzmet jáne dini birlestikter týraly zańdy buzǵany úshin aiyp taqqan edi. Iaǵni, Adambai Instagram áleýmettik jelisinde dini mazmundy ruqsatsyz taratqany úshin jaýapqa tartyldy. Sebebi mundai mazmun tek meshitter men dini mektepterde ǵana jariialanýy kerek degen zań bar.
“Dini senim bostandyǵy — ár adamnyń ajyramas quqyǵy. Qazaqstannyń bul sheshimi dini erkindikti shekteitin avtoritarlyq qadam dep esepteimiz jáne aiyppuldy joiýdy, zańdy qaita qaraýdy talap etemiz”, - dedi CAIR ókili Ibragim Hýper.
AQSh Memlekettik departamentiniń málimetine sáikes, “Qazaqstanda tirkelgen dini uiymdardyń músheleri ǵibadat oryndarynda jáne jeke úilerinde dini senimderin ashyq ustanǵanymen, bilik keibir adamdardy dini kózqarastary men senimderine bailanysty aiyptap, qýdalap, tipti túrmege qamaityny” anyqtalǵan.
Aita keteiik, buǵan deiin tanymal akter ári prodiýser Nurtas Adambaiǵa Instagram áleýmettik jelisinde Quran aiattaryn jariialaǵany úshin 184 600 teńge kóleminde aiyppul salynǵan edi.
Bul sheshimdi Astananyń mamandandyrylǵan aýdanaralyq ákimshilik soty qabyldady.
Nurtas Adambai buǵan qatysty zańdardy bilmegenin aityp aqtalǵanymen, sot protsesi óte jyldam ótti. Sot barysynda Adambai Mádeniet jáne aqparat ministrin sotqa shaqyrýdy suraǵan, biraq bul talap oryndalmaǵan.
Adambai óziniń áleýmettik jelidegi jazbalarynda jasaǵan áreketterine ókinish bildirip, osy áreketterimen renjitken bolýy múmkin tulǵalardan, sonyń ishinde tanymal qairatkerlerden, buqaralyq aqparat quraldarynan jáne Qazaqstan, Resei, Belarýs prezidentterinen keshirim suraǵanyn atap ótti.
"Kelinka Sabina" jáne "Ákim" syndy tanymal filmderdegi komediialyq rólderimen tanymal bolǵan Nurtas Adambai sondai-aq Qazaqstanda LǴBT quqyqtaryna qatysty syn aitqan bolatyn. Ol buǵan deiin prezident Toqaevtan ózine qolaisyz kontentti tyiym salýdy suraǵan.
Adambaiǵa qatysty sot isi shilde aiynyń ortasynda bastalǵan edi. Bastapqyda sot tyńdaýy beinekonferentsiia arqyly ótkiziledi dep josparlanǵan bolatyn, biraq keiinirek ol keiinge shegerildi. Sońynda sot Adambaiǵa aiyppul salý týraly sheshim qabyldady.
