Almatyda 23-25 qyrkúiek aralyǵynda Ósimdik pitomnikteri jónindegi Ortalyq Aziia qaýymdastyǵynyń (ÓPJOA) IV konferentsiiasy jáne Green Spaces Expo 2026 halyqaralyq kórmesi ótýde. Is-sharanyń ashylý saltanatyna Almaty qalasy ákiminiń birinshi orynbasary Almashan Smatlaev qatysty, dep habarlaidy dalanews.kz.
Konferentsiiaǵa qalalyq ákimdikterdiń, ósimdik pitomnikteri men baý-baqsha ortalyqtarynyń ókilderi, sáýletshiler, ýrbanister, landshaft salasynyń mamandary, ǵalymdar jáne túrli elderden kelgen kompaniialar qatysýda. Biyl kórmege 15 elden 80-nen astam eksponent qatysyp otyr. Kórme ósimdik pitomnikteri, kógaldandyrý, sondai-aq qoǵamdyq jáne jeke keńistikterdi abattandyrý máselelerine arnalǵan.
Almaty úshin mundai is-sharany ótkizý qalalyq ortany damytý baǵytynda tájiribe almasýǵa jáne zamanaýi sheshimdermen tanysýǵa múmkindik beredi. Baǵdarlama aiasynda jasyl aimaqtardy jobalaý jáne kútip ustaý, klimattyq jaǵdailardy eskere otyryp ósimdikterdi tańdaý, sýarý júieleri men jańbyr sýyn saqtaý, sondai-aq turaqty qoǵamdyq keńistikterdi qalyptastyrý tásilderi talqylanýda.
Baǵdarlamanyń mańyzdy bóligi praktikalyq oqytýǵa arnalǵan. Qalany kógaldandyrýdy basqarý salasyndaǵy mamandar úshin qarqyndy oqytý kýrstary men seminarlar uiymdastyrylyp, onda merdigerlermen jumys isteý, otyrǵyzý materialdaryn tańdaý, ósimdikterdi otyrǵyzý jáne kútip-baptaý, sondai-aq oryndalǵan jumystardyń sapasyn baqylaý máseleleri qarastyrylady. Sonymen qatar «Ashyq mikrofon» formaty uiymdastyrylǵan. Eki saǵattyq sessiia barysynda qatysýshylar jetekshi sarapshylarǵa suraq qoiyp, saladaǵy naqty tájiribelik keisterdi talqylai alady.
Konferentsiiamen qatar «Atakent» KIBS aýmaǵynda Green Spaces Expo 2026 halyqaralyq kórmesi ótýde. Munda Qazaqstan, Resei, Germaniia, Niderland, Polsha, Belgiia, Túrkiia, Ózbekstan, Qyrǵyzstan, Qytai jáne basqa da elderden kelgen pitomnikter men óndirýshiler óz ónimderi men sheshimderin tanystyrýda.
Baǵdarlamanyń qorytyndysy 25 qyrkúiekte ótetin Green Expert praktikalyq kúnimen aiaqtalady. Qatysýshylar Almatydaǵy júzege asyrylǵan qalalyq kógaldandyrý nysandaryn, Bas botanikalyq baqty aralap, jasyl jelekterdi kútip-baptaý boiynsha sheberlik sabaqtaryna qatysady.
Konferentsiia Almaty qalasy, Timiriazev kóshesi, 42, 1 korpýs mekenjaiyndaǵy «Atakent» KIBS-tiń «Baqshasarai» qabyldaý úiinde ótýde.
