Діни бостандықтарға жәрдемдесуді өзінің мақсаты деп санайтын норвегиялық Forum 18 ұйымы қазақстандық шоумен Нұртас Адамбайдың ісіне назар аударды, - деп хабарлайды Dalanews.kz.
Адамбай әлеуметтік желіде Құраннан үзінді келтіргені үшін айыпталған болатын.
Forum 18 мәліметінше, Шоуменнің ісін Астана қаласының мамандандырылған ауданаралық әкімшілік соты қарауы керек. Нұртас Адамбайға қатысты тергеу жүріп жатқаны туралы ақпарат 1 тамызда тарағанымен сот тыңдаулары әлі басталған жоқ.
Forum 18 Астана Дін істері басқармасының басшысы Қайролла Күшқалиев Адамбайдың Құраннан үзінді келтіргені үшін неліктен жазалануы керегін түсіндіре алмады деп санайды. Дін істері комитетінің төрағасы Ержан Нөкежанов пен оның орынбасары журналистерге жауап бермеді.
"Астана Дін істері басқармасының қызметкерлері Адамбайға қатысты істі дайындаған бас маман Әсел Даниярованың қазір еңбек демалысында екенін хабарлады. Біз департамент басшысы Қайролла Күшқалиевпен 14 қарашада хабарласқан едік, бірақ ол Forum 18 сайтының Адамбайды интернетте Құраннан үзінді келтіргені үшін неге жазаламақшы деген сауалына жауап бермеді", - деп жазды норвегиялық ұйым.
Бұған дейін мұсылмандар құқын қорғайтын жаһандық ұйым Нұртас Адамбайға араша түскен болатын.
Америкадағы мұсылмандар құқығын қорғаумен айналысатын ең ірі ұйым — Америка-Ислам қатынастары кеңесі (CAIR) Құраннан аят келтіргені үшін актер Нұртас Адамбайға айыппұл салған Қазақстан үкіметін қатаң сынға алды.
Бұған дейін Қазақстан үкіметі өнер иесіне діни қызмет және діни бірлестіктер туралы заңды бұзғаны үшін айып таққан еді. Яғни, Адамбай Instagram әлеуметтік желісінде діни мазмұнды рұқсатсыз таратқаны үшін жауапқа тартылды. Себебі мұндай мазмұн тек мешіттер мен діни мектептерде ғана жариялануы керек деген заң бар.
“Діни сенім бостандығы — әр адамның ажырамас құқығы. Қазақстанның бұл шешімі діни еркіндікті шектейтін авторитарлық қадам деп есептейміз және айыппұлды жоюды, заңды қайта қарауды талап етеміз”, - деді CAIR өкілі Ибрагим Хупер.
АҚШ Мемлекеттік департаментінің мәліметіне сәйкес, “Қазақстанда тіркелген діни ұйымдардың мүшелері ғибадат орындарында және жеке үйлерінде діни сенімдерін ашық ұстанғанымен, билік кейбір адамдарды діни көзқарастары мен сенімдеріне байланысты айыптап, қудалап, тіпті түрмеге қамайтыны” анықталған.
Айта кетейік, бұған дейін танымал актер әрі продюсер Нұртас Адамбайға Instagram әлеуметтік желісінде Құран аяттарын жариялағаны үшін 184 600 теңге көлемінде айыппұл салынған еді.
Бұл шешімді Астананың мамандандырылған ауданаралық әкімшілік соты қабылдады.
Нұртас Адамбай бұған қатысты заңдарды білмегенін айтып ақталғанымен, сот процесі өте жылдам өтті. Сот барысында Адамбай Мәдениет және ақпарат министрін сотқа шақыруды сұраған, бірақ бұл талап орындалмаған.
Адамбай өзінің әлеуметтік желідегі жазбаларында жасаған әрекеттеріне өкініш білдіріп, осы әрекеттерімен ренжіткен болуы мүмкін тұлғалардан, соның ішінде танымал қайраткерлерден, бұқаралық ақпарат құралдарынан және Қазақстан, Ресей, Беларусь президенттерінен кешірім сұрағанын атап өтті.
"Келинка Сабина" және "Әкім" сынды танымал фильмдердегі комедиялық рөлдерімен танымал болған Нұртас Адамбай сондай-ақ Қазақстанда ЛҒБТ құқықтарына қатысты сын айтқан болатын. Ол бұған дейін президент Тоқаевтан өзіне қолайсыз контентті тыйым салуды сұраған.
Адамбайға қатысты сот ісі шілде айының ортасында басталған еді. Бастапқыда сот тыңдауы бейнеконференция арқылы өткізіледі деп жоспарланған болатын, бірақ кейінірек ол кейінге шегерілді. Соңында сот Адамбайға айыппұл салу туралы шешім қабылдады.
